Pune News : आंबेगावातील विहिरीत पडलेल्या बिबट्याच्या बछड्याची सुखरुप सुटका

निरगुडसर : आंबेगाव येथील कारफाटयावर विहीरीत पडलेल्या बिबट्याच्या बछड्याला वनविभाग,रेक्यू टिमला सुखरूप बाहेर काढण्यात यश मिळाले, बछड्याला जीवदान दिल्याची घटना सोमवारी (ता.१३) रोजी घडली.

रांजणी जवळील कारफाटा येथे चार ते पाच शेतकऱ्यांची मिळून एकत्रित विहीर आहे. सकाळी संतोष गोपाळे हे वीज पंप सुरू करण्यासाठी गेले असता त्यांना विहिरीतून डरकाळी फोडणारा आवाज आला,त्यांनी विहिरीत डोकावले तर बिबट्याचा बछडा हा वीजपंपाच्या झोपाळ्यावर त्यांना दिसला.त्यांनी लगेचच वनविभागाला घटनेची कल्पना दिली.

वनविभाग व रेस्क्यू टिम घटनास्थळी दाखल झाली.वन विभागाच्या रेस्क्यू टिमच्या सदस्यांनी झुला तयार करून तो दोरांचा साह्याने विहीरीत सोडून रेस्क्यू टिमचे दोन सदस्य खाली उतरुन बछड्याला झुल्याच्या दिशेला हुसकले. बछडा झुल्यावर बसल्यानंतर झुला अलगदपणे वर ओढून घेण्यात आला. बिबट बछड्याला अवसरी घाट वन उद्यानात पुढील उपचारासाठी हलविण्यात आले आहे.