Suhana Swasthyam Festival: ‘अमृतानुभव’ने आजपासून ‘स्वास्थ्यम्’ला सुरुवात

पुणे : संतसाहित्यातील ज्ञानामृत रसाळ पद्धतीने उलगडणाऱ्या ‘अमृतानुभव’ या अनोख्या कार्यक्रमाने शुक्रवारपासून (ता. ५) ‘सकाळ’ प्रस्तुत ‘सुहाना स्वास्थ्यम्’ या महोत्सवाला सुरुवात होत आहे. सर्वांगीण आरोग्याचा भव्य महोत्सव असणाऱ्या ‘सुहाना स्वास्थ्यम्’चा हा स्वास्थ्यजागर पुढील तीन दिवस रंगणार आहे.

‘सकाळ’ प्रस्तुत ‘सुहाना स्वास्थ्यम्’ या महोत्सवासाठी ‘सुहाना मसाले’ हे मुख्य प्रायोजक आहेत. विश्वकर्मा विद्यापीठ हे सहप्रायोजक असून, भारती विद्यापीठ हे सहयोगी प्रायोजक आहेत. या महोत्सवाचे हे चौथे वर्ष असून, यंदा या महोत्सवाची व्याप्ती अधिकच वाढली आहे. शुक्रवार ते रविवार (ता. ७) असे तीन दिवस शहरातील विविध भागांमध्ये महोत्सवातील कार्यक्रम होणार असून, यात नामवंत वक्त्यांचे मार्गदर्शन आणि दर्जेदार कार्यक्रमांची पर्वणी पुणेकरांना मिळणार आहे.

आरोग्याच्या आणि जीवनाच्या प्रत्येक पैलूबाबत मार्गदर्शन करणाऱ्या या महोत्सवाला पुणेकरांनी भरभरून प्रतिसाद दिला आहे. शुक्रवारी (ता. ५) सायंकाळी ६.३० वाजता बालगंधर्व रंगमंदिरात ‘अमृतानुभव’ या कार्यक्रमाने ‘स्वास्थ्यम्’ महोत्सवाला सुरुवात होणार आहे. या कार्यक्रमाला भरभरून प्रतिसाद मिळाल्याने कार्यक्रमाची सर्व तिकिटे संपली आहेत.

संतश्रेष्ठ ज्ञानेश्वर महाराजांच्या ७५०व्या जन्मोत्सवानिमित्त ‘अमृतानुभव’ ही कलाकृती सादर केली जाणार आहे. श्रीरंग गोडबोले लिखित-दिग्दर्शित हा कार्यक्रम ज्येष्ठ गायक रघुनंदन पणशीकर, ज्येष्ठ गायिका आरती अंकलीकर-टिकेकर, संकर्षण कऱ्हाडे, मुग्धा वैशंपायन, प्रथमेश लघाटे, राहुल जोशी, आनंदी जोशी, सचिन इंगळे हे कलाकार सादर करणार आहेत.

संतांनी महाराष्ट्राच्या जनजीवनाची आणि भावविश्वाची आध्यात्मिक बैठक भक्कम केली. संतांचे विचार आणि शिकवण केवळ आध्यात्मिक उन्नतीसाठीच नव्हे, तर एक निरोगी आणि आनंदी जीवन जगण्यासाठी मार्गदर्शक ठरते. हीच शिकवण या कार्यक्रमातून उलगडणार आहे. संतसाहित्य आणि तत्त्वज्ञान यांची रोजच्या अनुभवांशी सांगड घालून गीत सादरीकरण आणि निरूपण स्वरूपात हा कार्यक्रम सादर होईल.

मेट्रोचा वापर करण्याचे आवाहन

‘सकाळ’ प्रस्तुत ‘सुहाना स्वास्थ्यम्’ या महोत्सवातील तिन्ही दिवसांचे कार्यक्रम स्थळ मेट्रोच्या मार्गांवर आहेत. या महोत्सवासाठी नागरिकांच्या गर्दीनुसार मेट्रोच्या फेऱ्या वाढविण्याचे नियोजनही ‘महामेट्रो’ने केले आहे. त्यामुळे तिन्ही दिवसांच्या कार्यक्रमांना येणाऱ्या नागरिकांनी मेट्रोचा वापर करावा, असे आवाहन ‘सकाळ’ आणि ‘महामेट्रो’ने केले आहे.