आंतरराष्ट्रीय विमानतळासाठी पर्यायी जागांचे सर्वेक्षण अंतिम टप्प्यात

पुरंदरमधील प्रस्तावित आंतरराष्ट्रीय विमानतळासाठी चार जागांची चाचपणी
पुणे - पुरंदर तालुक्‍यात प्रस्तावित आंतरराष्ट्रीय विमानतळासाठी निश्‍चित केलेल्या जागेसह याच तालुक्‍यातील चार पर्यायी जागांच्या तपासणीचे काम अंतिम टप्प्यात आले आहे. दोन ते तीन दिवसांत त्याचा अहवाल प्राप्त झाल्यानंतर तो राज्य सरकारला सादर करण्यात येईल, असे महसूल विभागातील वरिष्ठ अधिकाऱ्याने सांगितले. 

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

पुरंदर येथे विमानतळ उभारण्यासाठी सात गावांमधील सुमारे २ हजार ८३२ हेक्‍टर जागेची आवश्‍यकता आहे. भूसंपादनासाठी चार पर्यायदेखील निश्‍चित करण्यात आले आहेत; मात्र राज्य सरकारने त्यावर अद्याप निर्णय घेतला नाही. उपमुख्यमंत्री अजित पवार यांच्या अध्यक्षतेखाली मुंबईत बैठक झाली होती. या बैठकीत या जागेचे भूसंपादन सुरू करण्यापूर्वी निश्‍चित केलेल्या जागांसह अन्य पर्याय जागेची पुन्हा एकदा हवाई दल आणि लष्कराकडून तपासणी करून घ्यावी, तसेच प्रशासनाने मोबदल्यासंदर्भात जे चार पर्याय सुचविले आहेत, त्यांचा फेरआढावा घ्यावा, एकच पर्याय न देता दोन ते तीन पर्यायांचा मिळून एक पर्याय देता येईल का, याचा विचार करावा, असा निर्णय घेण्यात आला होता.

पाणी प्रदूषण रोखायचंय? तर तुम्हाला पुणे विद्यापीठ देणार ट्रेनिंग

त्याला तीन आठवड्यांहून अधिक कालावधी झाला आहे. या कालावधीत अन्य पर्यायी जागांच्या तपासणीचे काम सुरू आहे. येत्या दोन ते तीन दिवसांत त्याचा अहवाल येणे अपेक्षित आहे.

नवीन वर्षात भूसंपादनाची प्रक्रिया
विमानतळाच्या जागेचे भूसंपादन करताना शेतकऱ्यांना मोबदला देण्यासंदर्भातील पर्याय तयार आहेत. त्याची पुन्हा एकदा तपासणी करण्याचे काम सुरू आहे. हिवाळी अधिवेशनात भूसंपादनासाठी निधी उपलब्ध करून देण्यात येणार आहे. त्यामुळे नवीन वर्षात भूसंपादनाची प्रक्रिया सुरू होण्याची शक्‍यताही अधिकाऱ्यांनी बोलून दाखविली.

Edited By - Prashant Patil