Seva Vikas Bank : अमर मूलचंदानी यांना ईडीकडून अटक, सात जुलैपर्यंत कोठडी

पुणे - पिंपरी येथील सेवा विकास सहकारी बँकेचे माजी अध्यक्ष अमर साधुराम मूलचंदानी यांना अंमलबजावणी संचालनालयाने (ईडी) अटक केली आहे. मुंबईतील विशेष न्यायालयाने मूलचंदानी यांना शुक्रवारपर्यंत (ता.७) ईडी कोठडीत ठेवण्याचे आदेश दिले आहेत.

ईडीच्या सूत्रांनी दिलेल्या माहितीनुसार, सेवा विकास बँकेचे माजी अध्यक्ष अमर मूलचंदानी यांच्याविरुद्ध ईडीने २८ जानेवारी रोजी कारवाई केली होती. मूलचंदानी यांच्यासह इतर संचालकांनी ४२९ कोटी रुपयांची बँकेची फसवणूक केल्याप्रकरणी मूलचंदानी यांच्या निवासस्थानी आणि कार्यालयावर ईडीने छापे टाकले होते.

तपासात असहकार्य आणि सरकारी कामात अडथळा आणल्याबाबत मूलचंदानी यांच्यासह कुटुंबीयांविरुद्ध ईडीने स्वतंत्र गुन्हा दाखल केला होता. त्यानंतर ईडीने मूलचंदानी, रोझरी एज्युकेशन ग्रुपचे संचालक विनय अऱ्हाना, सागर सूर्यवंशी, खेमचंद भोजवानी आणि त्यांच्या कुटुंबीयांची १२२ कोटींची मालमत्ता जप्त केली होती.

मूलचंदानी आणि संचालकांनी मर्जीतील कर्जदारांना बेकायदेशीरपणे कर्ज मंजूर केले. कर्जदारांची पत न तपासता पुरेशा तारण मालमत्तेशिवाय आणि कमिशन घेऊन कर्ज मंजूर केले. त्यामुळे बँक दिवाळखोरीत निघाली असून, अनेक ठेवीदारांचे नुकसान झाले. रोझरी स्कूलचे विनय अऱ्हाना, सागर सूर्यवंशी, खेमचंद भोजवानी यांनी सेवा विकास बँकेकडून कर्ज घेतले होते.

मूलचंदानी यांनी केलेल्या गैरव्यवहारात अऱ्हाना, सूर्यवंशी, भोजवानी यांचा सहभाग असल्याचे ईडीच्या तपासात समोर आल्यानंतर मूलचंदानी यांच्याविरुद्ध कारवाई केली होती. ईडीकडून दाखल करण्यात आलेल्या गुन्ह्यात मूलचंदानी यांना अटक करण्यात आली. ईडीच्या पथकाने त्यांना मुंबईतील विशेष न्यायालयात हजर केले. न्यायालयाने त्यांना ईडीच्या कोठडीत ठेवण्याचे आदेश दिले आहेत.