Coronavirus: पुण्यात आजपासून तीन दिवस व्यापार बंद 

किराणा, दूध, भाजीपाला, औषधी दुकानांना वगळले 
पुणे - शहरातील कोरोना संसर्गाच्या पार्श्‍वभूमीवर उद्यापासून (मंगळवार) तीन दिवस व्यापार बंद ठेवण्याचा निर्णय पुणे व्यापारी महासंघाने घेतला आहे. महासंघाच्या आज झालेल्या बैठकीत हा निर्णय घेण्यात आला आहे. यामुळे गुरुवारपर्यंत (ता. 19) शहरातील घाऊक आणि किरकोळ व्यापार बंद राहणार आहे. मात्र, या बंदमधून जीवनावश्‍यक वस्तू किराणा, दूध, भाजीपाला, औषधी दुकाने आदींना वगळण्यात आले आहे. 

- आता बातम्या ऐकण्यासाठी डाऊनलोड करा ई-सकाळचे ऍप 

तीन दिवसांनंतर शहरातील कोरोनाबाबतच्या परिस्थितीचा आढावा घेऊन पुढील निर्णय येत्या गुरुवारच्या बैठकीत घेण्यात येणार आहे. बैठकीस सराफ, होजिअरी, कापड, ऑटोमोबाईल, प्लायवूड, स्टील, नॉन फेरस मेटल, पेपर, प्लॅस्टिक, इलेक्‍ट्रिक अँड इलेक्‍ट्रॉनिक, मशिनरी व वेल्डिंग, कॉम्प्युटर, टॉईज, वॉच, सायकल, केमिकल आदी व्यापारी संघटनांचे पदाधिकारी उपस्थित होते. 

महासंघाचे अध्यक्ष फत्तेचंद रांका, वरिष्ठ उपाध्यक्ष सूर्यकांत पाठक, उपाध्यक्ष रतन किराड, सचिव महेंद्र पितळीया, सहसचिव हेमंत शहा, सहसचिव जयंत शेटे, खजिनदार मनोज सारडा, मोहन पटेल, दीपक शहा, शांतिलाल ओसवाल, नितीन काकडे, बॉबी माईनी, रवी जसनानी, सुरेश जेठवानी, प्रसाद देशपांडे, उमेश झंवर, मंगेश भालेराव, बक्षीसिंग तलवार, अभय गाडगीळ, सुरेश पोळेकर, प्रमोद चव्हाण आदी बैठकीस उपस्थित होते. 

- कोरेगाव भीमा : नवलखा, तेलतुंबडे यांच्या अडचणीत वाढ; सुप्रीम कोर्टाचे आदेश

हे चालू राहणार 
- किराणा दुकान 
- औषधी दुकान 
- दूध डेअरी 
- फळे, भाजीपाला 

हे बंद राहणार 
- कापड दुकान 
- हार्डवेअर 
- मोबाईल शॉपी 
- स्टेशनरी आणि कटलरी 
- सराफी दुकान 
- इलेक्‍ट्रिक व इलेक्‍ट्रॉनिक्‍स 

जीवनावश्‍यक वस्तूंअभावी नागरिकांची गैरसोय होऊ नये, यासाठी येथील भुसार बाजार सुरूच ठेवण्यात येणार आहे. यामुळे बंदच्या काळातही किराणा माल, गूळ, भुसार आदी क्षेत्रातील व्यापार सुरळीतपणे सुरू राहणार आहे. 
- पोपटलाल ओस्तवाल,  अध्यक्ष, दी पूना मर्चंट्‌स चेंबर 

या बंदमधून जीवनावश्‍यक वस्तू आणि औषधांना वगळण्यात आले आहे. त्यामुळे भाजीपाला, दूध आणि औषधांची दुकाने नेहमीप्रमाणे सुरू राहणार आहेत. 
- फत्तेचंद रांका, अध्यक्ष, व्यापारी महासंघ