खंडित विजेमुळे कंपन्या हैराण

सणसवाडी : शिरूर तालुक्यातील सणसवाडी येथील औद्योगिक परिसरात सध्या लोडशेडिंग (भारनियमन) नसले, तरी सततच्या इंटरपशन (वीज खंडित) होण्यामुळे सव्वाशे ते दिडशे कंपन्या हैराण झाल्या आहेत. अचानक वीज जाणे आणि साधारण पंधरा मिनिटे ते दीड तासांपर्यंत ती पुन्हा न येणे, या कारणामुळे एकूण उप्तादनापैकी साधारण ७ ते १० टक्क्यांपर्यंत फटका बसत आहे.
सणसवाडी, शिक्रापूर, कोरेगाव भीमा, पिंपळे जगताप, कोंढापुरी, करंदी, डिंग्रजवाडी आदी भागात सुमारे सव्वाशे ते दिडशे कंपन्या कार्यरत आहेत. सध्या या भागात कुठल्याही प्रकारचे लोडशेडिंग नाही. मात्र, कधीही अचानक वीज जाण्याचा प्रकार इतका वाढलाय की, लोडशेडिंग परवडले, अशी प्रतिक्रिया अनेक कंपन्यांच्या आहेत.
बहुतेक सर्वच कंपन्यांमधील सीनसीसह अनेक मशिनरी अ‍ॅटोमेटीक असून, त्या सुरू होऊन प्रत्यक्षात प्रॉडक्शन करण्यासाठीचा काळ साधारण १५ मिनीटे ते अर्धा तास एवढा आहे. एकदा या मशिनरी बंद पडल्या की, पुढील दीड दोन तास संपूर्ण कंपनी उत्पादनच ठप्प होते. त्याचा एकूण सरासरी उत्पादन फटका सरासरी ७ ते १० टक्क्यांपर्यंत असल्याचे सर्वच कंपन्यांमधून सांगितले जाते. या प्रश्नी महावितरणकडे सर्व कंपन्यांचे वतीने एकत्रित आणि वैयक्तिकरीत्याही तक्रारी अर्ज केलेले आहेत. मात्र, तांत्रिक अडचणी येत असल्याचे महावितरणकडून सांगण्यात येते.
याबाबत तत्काळ कार्यवाही होणे गरजेचे असून, कोरोनानंतर कंपन्या सुरळीत सुरू असताना आता महावितरणकडून दक्षता घेण्याची विनंतीही अनेक कंपन्यांचे प्रतिनिधींकडून सातत्याने सध्या होत आहे.

औद्योगिक क्षेत्रातील वीज जाणे आणि ती परत येणे, एवढीच छोटी प्रक्रीया नसते. कारण, बहुतांश मशिनरी या हल्ली इंपोर्टेड असतात. त्या एकदा सुरू केल्या, की बंद करता येत नाहीत. त्या बंद झाल्या, तर पुन्हा त्या सुरू करण्यासाठी मोठा वेळ द्यावा लागतो. त्यातच वीज गेली की कधी येणार, हे समजत नाही. दरम्यानच्या काळात आम्ही जनरेटर सुरू करावेत की नाही याबाबत काहीच निर्णय घेता येत नाहीत. म्हणून औद्योगिक क्षेत्रातील वीज जाण्याच्या प्रकारांबाबत धोरणात्मक निर्णय व्हायला हवा आहे.
- जगदीश मुळे, एच.आर. व्यवस्थापक, सुल्झर इंडिया, कोंढापुरी (ता. शिरूर)