सख्खे बहीणभाऊ ‘क्लास वन अधिकारी’

आंबेठाण, ता. १२ : खेड तालुक्याच्या पश्चिम भागातील वेल्हावळे येथील भाऊ राजेश नलावडे आणि लग्नानंतर शिवेकर परिवारात दिलेली त्यांची बहीण जयश्री शिवेकर यांनी महाराष्ट्र लोकसेवा आयोगाच्या २०२४ च्या परीक्षेत उत्कृष्ट यश संपादन केले आहे. बहीणभाऊ ‘क्लास वन अधिकारी’ (प्रथम श्रेणी अधिकारी) होण्याची खेड तालुक्यातील ही जवळपास पहिलीच वेळ असल्याने खेड तालुक्याच्या पश्चिम भागातील नागरिकांसह या परिवाराच्या नातेवाइकांनी आनंद व्यक्त केला आहे.
खेड तालुक्याच्या पश्चिम आणि दुर्गम भागात असणाऱ्या वेल्हावळे येथील राजेश रामदास नलावडे यांची साहाय्यक राज्यकर आयुक्त वर्ग-एक या पदासाठी निवड झाली असून त्यांची बहीण जयश्री सतीश शिवेकर यांची साहाय्यक संचालक वित्त व लोकसेवा या पदावर निवड झाली आहे. जयश्री सतीश शिवेकर यांचा जीवन प्रवास विशेष प्रेरणादायी असून वयाच्या अवघ्या एकोणिसाव्या वर्षी सून म्हणून त्या शिवे गावातील शिवेकर परिवारात आल्या.त्यानंतर त्यांनी जिद्द, चिकाटी आणि आत्मविश्वासाच्या बळावर पदवी आणि पदव्युत्तर शिक्षण पूर्ण केले. त्यानंतर स्पर्धा परीक्षेची तयारी सुरू ठेवली. जयश्री सतीश शिवेकर यांच्या या यशामध्ये त्यांचे पती आणि सासू-सासरे यांच्या मोलाचे मार्गदर्शन आणि भक्कम पाठबळ त्यांना लाभले. शिवेकर कुटुंबातील त्यांचे लहान दीर संजय सुदाम शिवेकर हे शासनाच्या एमएमआरडीए विभागात कक्ष अधिकारी या पदावर काम करत आहेत. शिक्षण,शिस्त व प्रेरणादायी वातावरण ही शिवेकर कुटुंबाची एक वेगळी ओळख ठरत आहे. स्पर्धा परीक्षेची तयारी करणाऱ्या महिलांसाठी जयश्री शिवेकर यांचे यश हे निश्चित प्रेरणादायी ठरणार असून त्यांच्या यशाबद्दल सर्वत्र त्यांचे अभिनंदन केले जात आहे.

3517, 3518