शरद बुट्टे पाटील यांचा आज राष्ट्रवादीत प्रवेश

आंबेठाण, ता. १८ : उत्तर पुणे जिल्हा भाजपचे माजी अध्यक्ष आणि जिल्हा परिषदेचे माजी सभापती शरद बुट्टे पाटील हे सोमवारी (ता. १९) राष्ट्रवादी काँग्रेसमध्ये प्रवेश करणार आहेत. तब्बल बारा वर्षानंतर ते पुन्हा स्वगृही परतत आहेत.
बुट्टे पाटील यांनी भामा खोऱ्याचे जिल्हा परिषदेत प्रतिनिधित्व करताना स्वतः तब्बल तीन वेळा विजय मिळविला होता. तर एकदा गटात राखीव जागा आली असताना त्यांच्या समर्थक महिलेला बिनविरोध जिल्हा परिषद सदस्य करून जिल्ह्यात इतिहास घडवला होता. सन १९९९मध्ये राष्ट्रवादी काँग्रेसच्या स्थापनेवेळी त्यांनी राष्ट्रवादी युवक काँग्रेसचे तालुकाध्यक्ष म्हणून पक्षात सुरुवात केली होती. जिल्हा परिषदेत त्यांनी कृषी आणि पशुसंवर्धन खात्याचे सभापती म्हणून काम केले आहे. २०१४ च्या दरम्यान विधान परिषदेसाठी काम करूनही संधी न मिळाल्याने त्यांनी राष्ट्रवादी सोडत भाजपमध्ये प्रवेश केला होता. आता त्यांचा राष्ट्रवादी काँग्रेसमध्ये प्रवेश होत आहे. वराळे (ता. खेड) या त्यांच्या गावी उद्या आयोजित केलेल्या कार्यकर्ता मेळाव्यात स्वतः अजित पवार यांच्या उपस्थितीत ते राष्ट्रवादी काँग्रेसमध्ये प्रवेश करणार आहेत. त्यांच्यासमवेत विविध गावचे सरपंच आणि अन्य पदाधिकारी देखील प्रवेश करणार आहेत.