गणेगावात रस्त्याला वर्षभरात भेगा

मांडवगण फराटा, ता. २६ : गणेगाव दुमाला (ता. शिरूर) येथील हांडेवस्ती ते एस फोर चारी हा रस्ता पहिल्याच पावसात उखडून रस्त्याला भेगा पडल्याने निसर्गाने या रस्त्याचे निकृष्ट व बेजबाबदार काम झाल्याचे पितळच उघडे पाडले आहे. त्यामुळे या रस्त्याची तातडीने दुरुस्ती करावी, अशी मागणी येथील ग्रामस्थांनी केली आहे.
गणेगाव हद्दीतील कोंडेवस्ती ते एस फोर चारी रस्त्याचे अंदाजे एक वर्षांपूर्वी काम पूर्ण झाले आहे. पुणे जिल्हा परिषदेचे कार्यकारी अभियंता बांधकाम (दक्षिण विभाग) यांच्या अखत्यारीत हा रस्ता येतो. माजी आमदार अशोक पवार यांच्या निधीतून या रस्त्याला २५ लाखांचा निधी मंजूर करण्यात आला होता. मात्र, या रस्त्याचे काम सुरू असताना निकृष्ट दर्जाचे काम असल्याबाबत स्थानिक ग्रामस्थांनी संबंधित विभागाकडे तक्रारी केल्या होत्या. जिल्हा परिषदेच्या सार्वजनिक बांधकाम विभागाच्या अधिकाऱ्यांनी ग्रामस्थांच्या तक्रारीकडे दुर्लक्ष करीत संबंधित ठेकेदाराला पाठीशी घालून रस्त्याचे काम पूर्ण करून घेतले. त्यामुळे जिल्हा परिषदेच्या बांधकाम विभागाच्या अधिकाऱ्यांनी पाहणी करत त्वरित या रस्त्याची दुरुस्ती करावी, अशी मागणी राजेंद्र कोंडे, नीलेश कोंडे, गणेश गरुड, सोमनाथ जगताप, रोहित गरुड, राजन गरुड, श्रीकांत कोंडे, प्रणव कोंडे या शेतकऱ्यांनी केली आहे.
हा रस्ता ठिकठिकाणी खचला असून, पुलाजवळ रस्त्याला भेगा पडल्या आहेत. नांद्रेमळा- कोंडेवस्ती या रस्त्याचे काम तीन वर्षांपूर्वी झालेले असूनही तो रस्ता अद्याप सुस्थितीत अवस्थेत आहे. मात्र, त्यानंतर झालेल्या या रस्त्याला अनेक ठिकाणी भेगा पडल्याचे दिसून येत आहे. गेल्यावर्षीही हाच रस्ता बऱ्‍याच ठिकाणी खचला होता. त्याचीच पुनरावृत्ती आता होऊन साइडपट्ट्या मोठ्या प्रमाणात खचल्या आहेत. या रस्त्याने रात्रीच्या वेळी मोठ्या प्रमाणात परिसरातील शेतकरी दुचाकीवरून ये- जा करीत असतात. हाच रस्ता पुढे जाऊन गणेगाव ते मांडवगण रस्त्याला जोडला गेला आहे. रस्त्यावर पडलेल्या भेगात अडकून दुचाकी चालकांचा अपघात होण्याची शक्यता नाकारता येत नाही. त्यामुळेच या रस्त्यावरून प्रवास करणे धोकादायक बनला आहे.

गणेगाव दुमाला येथील रस्त्याला भेगा व खचल्याबाबत नागरिकांकडून माहिती मिळाली आहे. लवकरच या रस्त्याची पाहणी करून तातडीने दुरुस्ती करण्यात येईल.
- अमित पाथरवट, कार्यकारी अभियंता, बांधकाम विभाग (दक्षिण), पुणे जिल्हा परिषद