मांडवगण फराटा येथे करदात्यांना बक्षीसांचे प्रोत्साहन

मांडवगण फराटा, ता. २७ : मांडवगण फराटा (ता. शिरूर) येथे १०० टक्के कर भरणाऱ्या करदात्यांसाठी ग्रामपंचायतीने लकी ड्रॉ द्वारे बक्षीस योजना जाहीर केली आहे. गावात विविध ठिकाणी फलक लावून याबाबत ग्रामपंचायतीने ७३ बक्षीसे जाहीर केली आहेत. मांडवगण फराटा ग्रामपंचायतीच्या महिला लोकनियुक्त सरपंच समीक्षा अक्षय फराटे व उपसरपंच अमोल शितोळे यांच्या माध्यमातून हा उपक्रम राबविला आहे.
सन २०२५-२६ या आर्थिक वर्षात १ एप्रिल ते ३१ मार्च २०२६ या कालावधीत जे खातेदार चालू घर कर व पाणी पट्टी कर व त्यापूर्वीचे सर्व कर १ ऑक्टोबर २०२५ पर्यंत जे लाभार्थी भरतील अशा करदात्यांचा लकी ड्रॉ काढण्यात येईल.भरणा करणाऱ्या खातेदारांमध्ये चिठ्या टाकून ७३ खातेदारांची निवड केली जाणार आहे. त्यातील दहा क्रमांक येणाऱ्या खातेदारांना बक्षीसे दिली जाणार आहेत. दसऱ्याच्या मुहूर्तावर २ ऑक्टोबर २०२५ रोजी याचे बक्षीस वितरण केले जाणार आहे. या लकी ड्रॉमध्ये प्रथम क्रमांक प्राप्त करणाऱ्या व्यक्तीला मोटारसायकल, व्दितीय क्रमांकाला एल. ईडी टीव्ही, तृतीय क्रमांकाला फ्रिज, चौथा क्रमांकाला आटा चक्की, पाचव्या क्रमांकाला वॉशिंग मशिन, सहाव्या क्रमांकाला दोन कुलर, सातव्या क्रमांकाला पंधरा मिक्सर, आठव्या क्रमांकाला सीलिंग फॅन, नवव्या क्रमांकाला २५ कुकर दहाव्या क्रमांकाला अकरा भिंतीवरील घड्याळ असे बक्षीस देण्याचा निर्णय ग्रामपंचायतीने घेतला आहे. त्यामुळे या ग्रामपंचायत अंतर्गत सहा प्रभागातील कुटुंबे आता संपूर्ण कर भरण्याच्या तयारीला लागले असून त्यांच्यात स्पर्धा निर्माण झाली आहे. ग्रामपंचायतीचा हा निर्णय गावाच्या विकासात एक पाऊल पुढे नेणारा ठरल्याने सर्वत्र या उपक्रमाचे कौतुक होत आहे.

मांडवगण फराटा ग्रामपंचायत गावात उत्तम आरोग्य, स्वच्छता कायम राहावी,गाव सदाहरित राहावे,मुलांना चांगल्या दर्जाचे शिक्षण मिळावे या व इतर गोष्टीसाठी आमचा पुढाकार आहे आणि जनताही सहकार्य करीत आहे. येणाऱ्या दिवसात मांडवगण फराटा ग्रामपंचायतीला राज्यातच नव्हे तर संपूर्ण देशात ओळखली जाईल, असे काही करण्याचा आमचा मानस आहे.
- समीक्षा फराटे, सरपंच, मांडवगण फराटा