वडगावात जावयाची सासऱ्याला मारहाण

आंधळगाव, ता. २३ : वडगाव रासाई (ता.शिरूर)येथील शेलारवाडी येथे कौटुंबिक वादातून जावयाने सासऱ्याला लाथाबुक्यांनी मारहाण केली. ही मंगळवारी (ता.२२) दुपारी दोन वाजण्याच्या सुमारास घडली. याबाबत बंडू बापूराव हतागळे (वय ४५, रा.वडगाव रासाई,मुळ रा. मंगरूळ, ता.माजलगाव, जि.बीड) यांनी दिली. यावरून तीन जणांविरुद्ध शिरूर पोलिस ठाण्यात गुन्हा दाखल केला आहे.

पोलिसांनी दिलेल्या माहितीनुसार, फिर्यादी बंडू हतागळे हे शेलारवाडी येथे राहतात. मंगळवारी दुपारी राहत्या घरी त्यांचे जावई सचिन नारायण घोरपडे, नारायण सीताराम घोरपडे, राजाभाऊ रघुनाथ खंडागळे आणि इतर एक जण आले होते. त्यावेळी घरात चर्चा सुरू असताना ‘तू माझ्या मुलीला का मारहाण करतो?’ असे हतागळे यांनी विचारल्याने जावई सचिन घोरपडे संतप्त झाला. त्याने आपल्या मुलाला घेऊन घर सोडण्याचा प्रयत्न केला. तेव्हा सचिन यांच्या पत्नीने त्याला थांबविण्याचा प्रयत्न केला. यावेळी सचिनने पत्नीच्या केसांना पकडून तिला जमिनीवर आपटले. ही परिस्थिती पाहून हतागळे यांनी भांडण सोडवण्यासाठी मध्यस्थी केली. नारायण घोरपडे यांनी त्यांच्या डोक्यावर काठीने जोरदार वार केला. तसेच इतर आरोपींनी लाथाबुक्यांनी मारहाण केली आणि शिवीगाळ करीत “तू माझ्या मुलाला का अडवतोस? तुला जिवे मारून टाकीन,” अशी धमकी दिली. याप्रकरणी पोलिसांनी सचिन नारायण घोरपडे, नारायण सीताराम घोरपडे, राजाभाऊ रघुनाथ खंडागळे (सर्व रा.करंदी ता.शिरूर) यांच्या विरुद्ध गुन्हा नोंदविला आहे.