मांडवगणला फ्लॉवरवर फिरवला रोटावेटर

मांडवगण फराटा, ता.३१ : मांडवगण फराटा (ता. शिरूर) येथील गौरव चंद्रकांत शितोळे या शेतकऱ्याने योग्य बाजारभाव मिळत नसल्यामुळे फ्लॉवरच्या पिकामध्ये रोटावेटर फिरवला. सध्या बाजारात फ्लॉवरला कवडीमोल भाव मिळत आहे. फ्लॉवर काढणी व वाहतूक दर ही परवडत नसल्याने शेतकरी हतबल झाला आहे. त्यामुळे फ्लॉवर उत्पादकांना आर्थिक फटका सहन करावा लागत आहे.
मांडवगण फराटा येथे गेल्या पाच वर्षांपासून फ्लॉवर पीक लागवडीत मोठी वाढ झाली आहे. दिल्ली, मुंबई व पुणे येथील बाजारपेठेत फ्लॉवरला प्रतिकिलोला ६ ते ७ रुपये बाजारभाव मिळत आहे. असे असताना स्थानिक व्यापारी कमी भावात खरेदी करत असल्याने फ्लॉवर उत्पादक शेतकरी हतबल झाले आहे.
शितोळे यांनी मे महिन्यात पाच एकरमध्ये फ्लॉवरची लागवड केली होती. यासाठी त्यांना एकरी चाळीस ते पंचेचाळीस हजार रुपये खर्च आला होता. नेमक्या फ्लॉवर विक्रीच्या वेळेतच याचे बाजारभाव पडले. सध्या सहा ते सात रुपये खर्च किलो बाजारभाव मिळत असल्याने यात सुधारणा होण्याचे चिन्ह दिसत नसल्याने अखेरीस शितोळे यांनी फ्लॉवरच्या उभ्या पिकात जड अंतःकरणाने रोटरच घातला व पीक जमीनदोस्त केले.

फ्लॉवरला पंधरा दिवसापूर्वी ३० ते ३५ रुपये बाजारभाव मिळत होता. त्यामुळे मोठ्या आशेने अनेक शेतकऱ्यांनी फ्लॉवर पिकाची लागवड केली. मात्र सध्या बाजार पडल्याने शेतकऱ्यांचा उत्पादन खर्च निघत नाही. यावर्षी फ्लॉवर पिकातून १५ ते २० लाखांचे उत्पन्न मिळेल, अशी अपेक्षा होती. मात्र, कमी बाजार मिळत असल्याने फ्लॉवर रोटर फिरवण्याची वेळ शेतकऱ्यावर आली आहे.
- सूर्यकांत काशिनाथ शितोळे, शेतकरी मांडवगण फराटा (ता. शिरूर)

फ्लॉवर पिकाला प्रतिकिलोला सात ते आठ रुपये इतका उत्पादन खर्च येत आहे. त्यातच व्यापारी वर्ग कमी दरात फ्लॉवर खरेदी करत असल्याने शेतकऱ्याचा उत्पादन खर्च वसूल होत नाही.
- दिगंबर फराटे, शेतकरी, मांडवगण फराटा (ता. शिरूर)
02285