पावसामुळे फ्लॉवर उत्पादकांना फटका

मांडवगण फराटा, ता. १७ : शिरूर तालुक्याच्या पूर्व भागात गेल्या काही दिवसांपासून सुरू असलेल्या पावसामुळे काढणीला आलेल्या फ्लॉवर पिकावर काळी टीक रोगाचा प्रादुर्भाव झाला आहे. लाखो रुपयांचे नुकसान झाल्याने शेतकऱ्यांसमोर आर्थिक संकट उभे राहिले आहे. शासनाने त्वरित पंचनामे करून नुकसान भरपाई द्यावी, अशी मागणी शेतकऱ्यांमधून होत आहे.
येथील विठ्ठल शितोळे या शेतकऱ्याने दोन महिन्यांपूर्वी ऊस पिकात आंतरपीक म्हणून दोन एकरात १५ हजार फ्लॉवर रोपांची लागवड केली होती. यासाठी रोपे, औषध फवारणी, खते, मजुरी अशा खर्चासाठी प्रत्येकी एकरी ४० ते ४५ हजार रुपये इतका खर्च आला होता. मात्र दोन दिवसांपूर्वी काळ्या टीक रोगाचा प्रादुर्भाव झाल्याने पीक उद्ध्वस्त झाले. पीक रोगट झाल्याने उत्पादनात मोठी घट झाली असून व्यापारी फ्लॉवर कवडीमोल दराने खरेदी करत आहेत.

पाऊस होण्यापूर्वी पिकाला २० ते ३० रुपये भाव मिळत होता. मात्र पावसानंतर पिकावर टीक पडल्याने व्यापारी फक्त आठ ते दहा रुपयांपर्यंत भाव देत आहेत. पहिली तोडणी करण्यापूर्वीच माझ्या शेतातील ५० टक्क्यांहून अधिक पीक वाया गेले. शासनाने पंचनामे करून नुकसान भरपाई द्यावी.
- विठ्ठल शितोळे, शेतकरी.

सध्या फ्लॉवर पिकाला प्रतिकिलोला सात ते आठ रुपये उत्पादन खर्च येतो. पावसाने पिकाचे मोठे नुकसान झाले आहे. काळी टीक असल्याने व्यापारी कमी भाव देत आहेत. शेतकऱ्याचा खर्चही वसूल होत नसल्याची वस्तुस्थिती आहे.
- कैलास फराटे, शेतकरी.
02374