शिवाजी विद्यालयात दहशतवादविरोधी मॉकड्रिल

आंधळगाव, ता. ११ : वडगाव रासाई (ता. शिरूर) येथील छत्रपती शिवाजी विद्यालयात सोमवारी (ता. ८) शिरूर पोलिस ठाणे, बॉम्ब शोधक व नाशक पथक, जलद प्रतिसाद पथक आणि दहशतवादविरोधी पथक यांच्या वतीने दहशतवादी हल्ल्याचे मॉकड्रिल पार पडले.
विद्यालयात दोन संशयित व्यक्ती लपून बसल्याचा गोपनीय संदेश शिरूर पोलिस ठाण्याला मिळताच प्रभारी अधिकारी संदेश केंजळे यांनी टिम सक्रिय केली. नियंत्रण कक्ष, पुणे ग्रामीण यांना माहिती देऊन तत्काळ मांडवगण फराटा पोलिस चौकीचे पोलिस उपनिरीक्षक संतोष शेळके यांना सूचना पाठविण्यात आल्या. काही मिनिटांतच पोलिस उपनिरीक्षक शेळके व मांडवगण फराटा दूरक्षेत्राचे कर्मचारी, बॉम्ब शोधक व नाशक पथक, दहशतवादविरोधी पथक आणि अँटी ड्रोन पथक शाळेत दाखल झाले. त्यांनी शिक्षक व विद्यार्थ्यांना शांतपणे वर्गातून बाहेर काढून सुरक्षित स्थळी हलविले. संपूर्ण परिसर सील करून जलद प्रतिसाद पथकाने शाळेचा ताबा घेत सर्च ऑपरेशन सुरू केले.
दुसऱ्या मजल्यावरील एका वर्गात दोन अतिरेक्यांचा ठावठिकाणा लागताच त्यांना वेढा घालून पकडण्यात आले. शाळेबाहेरील भिंतीलगत स्फोटकांनी भरलेली संशयित बॅग आढळल्यावर त्याची विशेष उपकरणांच्या साहाय्याने तपासणी केली. सुरक्षित अंतरावर बॅग हलवून वॉटर डिस्रप्टरचा वापर करून स्फोटके निकामी करण्यात आली. त्यानंतर अग्निशामक दलाने जागेवर पाण्याचा वर्षाव करून परिसर अधिक सुरक्षित केला. या मोहिमेमुळे वरिष्ठ अधिकाऱ्यांची निर्णयक्षमता, अंमलदारांची तत्परता आणि विविध पथकांमधील समन्वय अधोरेखित झाला. संकटपरिस्थिती हाताबाहेर जाऊ न देता योग्य वेळी प्रतिसाद देण्याची पोलिस यंत्रणा किती सक्षम आहे, याचे प्रदर्शन या प्रात्यक्षिकातून झाले. नागरिकांच्या सुरक्षेबाबत शासन यंत्रणा सज्ज असल्याचा विश्वास या मॉकड्रिलमुळे वाढला आहे.
ही मोहीम पुणे ग्रामीणचे पोलिस अधीक्षक संदीप सिंह गिल यांच्या मार्गदर्शनाखाली शिरूरचे उपविभागीय पोलिस अधिकारी प्रशांत ढोले, शिरूर पोलिस ठाण्याचे पोलिस निरीक्षक संदेश केंजळे यांच्या नेतृत्वाखाली पार पडली.