आळंदीत ‘शाडू मातीपासून गणेशमूर्ती’ कार्यशाळा यशस्वी

आळंदी, ता. ८ : आळंदी नगर परिषदेमध्ये ‘शाडू मातीपासून गणेशमूर्ती’ बनविण्याची कार्यशाळा आज यशस्वीरित्या पार पडली. प्लास्टर ऑफ पॅरिसऐवजी शाडू मातीपासून मूर्ती बनवण्याचे महत्त्व आणि पर्यावरण रक्षणाचा संदेश प्रभावीपणे पोहोचवण्यासाठी नगर परिषदेमध्ये ही कार्यशाळा झाली. यावेळी मूर्ती बनविण्याच्या तांत्रिक व सर्जनशील बाबी विद्यार्थ्यांना तसेच सहभागी नागरिकांना शिकवण्यात आल्या. याबाबत मुख्याधिकारी माधव खांडेकर यांनी माहिती दिली.
माझी वसुंधरा अभियान ६.० व स्वच्छ सर्वेक्षण २०२५ अंतर्गत ही कार्यशाळा झाली. पर्यावरणपूरक गणेशोत्सव साजरा करण्याचा संदेश देण्याच्या उद्देशाने कार्यशाळेचे आयोजन करण्यात आले होते. लाल माती तसेच शाडू मातीपासून निसर्गपूरक गणेशमूर्ती बनविण्याचे प्रत्यक्ष प्रशिक्षण यावेळी देण्यात आले. मूर्तिकार शरद लोहार यांनी सहभागींना मार्गदर्शन केले. शालेय विद्यार्थी, महिला बचत गट, तसेच स्थानिक नागरिक यांनी या कार्यशाळेत सहभाग नोंदवला.
मुख्याधिकारी खांडेकर उपस्थितांना मार्गदर्शन करताना म्हणाले की, “पर्यावरणपूरक सण साजरे करणे ही काळाची गरज असून अशा कार्यशाळांद्वारे समाजात सकारात्मक बदल घडवता येऊ शकतो. हा उपक्रम आळंदीतील पर्यावरण जनजागृतीसाठी महत्त्वपूर्ण पाऊल ठरला असून, भविष्यातही असे उपक्रम नगरपरिषदेमार्फत राबवले जातील.’’