''माऊली माऊली''ने मध्यरात्री आळंदी दुमदुमले

आळंदी, ता. १६ : फुलांची आकर्षक सजावट... विद्युत रोषणाई... समाधीवर चांदीचा मुखवटा ठेवून त्यावर सोन्याचे केलेले आभूषण आणि गुलाबांच्या पुष्पात गुंफलेला मोरपीसांचा घातलेला हार... असे कृष्ण रूपातील माऊलींचे मनमोहक रुप भाविकांनी साठवून मनोभावे दर्शन घेतले.
भाविकांनी दर्शन घेतले. आणि माऊलीच्या अखंड जयघोष आणि टाळ मृदंगाच्या गजरात गजरात माऊलींच्या संजीवन समाधीवर शुक्रवारी (ता. १५) मध्यरात्री बारा वाजता गुलाबांची पुष्पवृष्टी, पेढे आणि सुंठवडा वाटून आळंदीतील देऊळवाड्यात माऊलींचा जन्मोत्सव उत्साहात साजरा करण्यात आला. माऊली माऊलीचा गजर आणि घंटा नादाने अलंकापुरीचा परिसर मध्यरात्रीनंतर दुमदुमून गेला.
संत ज्ञानेश्वर महाराजांच्या ७५० जन्मोत्सव वर्ष असल्याने देऊळ वाड्यावर आकर्षक विद्युत रोषणाई करण्यात आली होती. यानिमित्ताने देऊळवाड्यात हरिनाम सप्ताह होता. नामवंत कीर्तन करांचे कीर्तन प्रवचन होते. काल सायंकाळी पाच वाजण्याच्या दरम्यान माऊलींचा चांदीचा मुखवटा लाकडी रथात ठेवून त्याची नगर प्रदक्षिणा करण्यात आली. रथाला विद्युत रोषणाई होती. आळंदीकर रस्त्याच्या दुतर्फा दर्शनासाठी गर्दी करून होते. नगरप्रदक्षिणा झाल्यावर रात्री धुपारती झाली. त्यानंतर जन्मोत्सवाची तयारी सुरू झाली. पंखा मंडपात माऊली जन्माचे कीर्तन रात्री १० ते १२ पर्यंत सुरू होते. तर मंदिरात भाविकांनी गर्दी केली होती. कीर्तन कारने माऊली जन्म आणि कृष्णजन्म वर्णन केले. तत्पूर्वी पुजाऱ्यांनी प्रतिकात्मक मातीचे बनवलेले गोकुळाचे पूजन केले. त्यानंतर ठीक १२ वाजता माऊली जन्माचे वर्णन करताच उपस्थित भाविकांनी माऊलीच्या समाधीवर पुष्पवृष्टी केली आणि पेढे सुंठवडा वाटून जन्मोत्सव साजरा केला. दरम्यान, शनिवारी (ता. १६) सकाळी दहा वाजता काल्याच्या कीर्तनाने जन्मोत्सवाची सांगता झाली.

माऊलींचे लोभस रूप
माऊली जन्मोत्सवावेळी मुख्य गाभाऱ्यात समाधीवर चांदीचा मुखवटा ठेवून आकर्षक फुलांच्या माळांनी सजविण्यात आले. मोरपीस आणि सोन्याच्या आभूषणांनी मढवलेले लोभस रूप भाविकांनी डोळ्यात साठवून दर्शन घेतले.