आळंदीत संगीत नवरात्र उत्सव

आळंदी, ता. २० : नवरात्र उत्सवाच्या निमित्ताने आळंदीतील संत ज्ञानश्‍वर महाराज समाधी मंदिरात मुक्ताबाई मंडपामध्ये श्री संत मुक्ताबाई संगीत नवरात्र उत्सव कार्यक्रमाचे आयोजन घटस्थापने दिवशी सोमवारी (ता. २२) ते बुधवार (ता. १) दरम्यान करण्यात आले आहे. यानिमित्ताने आळंदीकरांना महिला भजनी मंडळाच्या भजनाबरोबरच श्री सूक्त विष्णुसहस्त्रनाम ज्ञानेश्‍वरी पारायण तसेच हरिपाठ ऐकण्याची संधी मिळणार आहे.
कार्यक्रमाचे आयोजन संगीत कला प्रतिष्ठान महिला भजनी मंडळाच्या वतीने केले आहे. घटस्थापना दिवशी शांती ब्रह्म मारुती महाराज कुरेकर यांच्या हस्ते दीपप्रज्वलनाने उद्‍घाटन होणार आहे. त्यानंतर मुक्ताबाई आणि ज्ञानेश्‍वर महाराजांचे प्रतिमापूजन आणि ग्रंथराज ज्ञानेश्‍वरीची पूजा केली जाणार आहे. दररोज सकाळी सात ते साडेसात श्रीसूक्त विष्णुसहस्त्रनाम, साडेसात ते साडेअकरा ज्ञानेश्‍वरी पारायण, सायंकाळी पाच ते साडेपाच हरिपाठ आणि सायंकाळी साडेपाच ते सात वाजेपर्यंत महिला भाविकांचा भजन, आरतीचा कार्यक्रम होणार आहे.