आळंदी येथील संस्कृत महाविद्यालयास मान्यता

आळंदी, ता. २७ : आळंदीतील भास्करगिरी महाराज शिक्षण प्रसारक मंडळ व सावित्रीबाई फुले पुणे विद्यापीठ यांच्यामध्ये बीए संस्कृत पदवी अभ्यासक्रम सुरू करण्यासंदर्भात सामंजस्य करार (MoU) विद्यापीठाच्या मुख्य इमारतीत शुक्रवारी (ता. २६) झाला. यामुळे संत ज्ञानेश्वर महाराज संस्कृत महाविद्यालयास मान्यता मिळाली असून आता आळंदी शहरातील विद्यार्थी तसेच वारकरी शिक्षण घेणाऱ्या विद्यार्थ्यांना संस्कृत शिकण्यासाठी आळंदीमध्ये नवे दालन खुले झाले आहे.
या प्रसंगी विद्यापीठाचे कुलगुरू डॉ. सुरेश गोसावी, प्र-कुलगुरू डॉ. पराग काळकर, रजिस्ट्रार डॉ. ज्योती भाकरे, संचालक डॉ. देविदास गोल्हार, संस्कृत विभाग प्रमुख डॉ. दिवाकर मोहंती तसेच संस्थेचे अध्यक्ष शंकर देवरे, उपाध्यक्ष राम देशमाने, संचालक सुभाष महाराज गेठे, गौरी देवरे उपस्थित होते. दरम्यान, आळंदीतील संत ज्ञानेश्वर महाराजांच्या संजीवन समाधीने पावन झालेल्या आळंदी नगरीतील वारकरी, संस्कृत शिक्षण संस्थांच्या मागणीनुसार विद्यापीठाने श्री संत ज्ञानेश्वर महाराज संस्कृत महाविद्यालयास मान्यता देऊन संस्कृत शिक्षणाची ज्ञानगंगा खुली केली आहे. आळंदीमध्ये २२० विद्यार्थी श्री संत ज्ञानेश्वर महाराज संस्कृत महाविद्यालयात शिक्षण घेत आहेत. विद्यार्थ्यांची संस्कृत शिक्षण घेण्याची मागणी सातत्याने वाढत असल्याकारणाने संस्थेने ही व्यवस्था अत्यंत कमी खर्चात म्हणजे अवघ्या चार हजार रुपयात विद्यापीठाच्या सहकार्याने निर्माण करून दिली आहे.
याबाबत महाविद्यालयाचे पदाधिकारी शंकर देवरे यांनी सांगितले की, विद्यापीठ कुलगुरूंनी विद्यार्थ्यांना प्रोजेक्ट वर्कच्या माध्यमातून समाजामध्ये प्रत्यक्ष जाऊन संस्कृत शिक्षणाला गती देण्याबाबतचे मार्गदर्शन केले. यामध्ये कार्य करणाऱ्या विद्यार्थ्यांना शासन किंवा विद्यापीठाच्या वतीने मानधन मिळू शकते असेही त्यांनी नमूद केले.