आळंदीत सोमवारी आरती सोहळा

आळंदी, ता. ९ : इंद्रायणी नदी घाट परिसरात घाण आणि कचऱ्याचे प्रमाण वाढत आहे. याच पार्श्वभूमीवर प्रशासन आणि नागरिकांना स्वच्छता, पर्यावरणप्रेम व नदी संवर्धनाचा संदेश पोहोचवण्याचा संकल्प आळंदी देवस्थानने केला असून सोमवारी (ता. १५) सायंकाळी सहा वाजता इंद्रायणी तीरी नमामी इंद्रायणी अंतर्गत महाआरती सोहळा आयोजित केला आहे.
या सोहळ्यात वारकरी शिष्यवर्ग सकाळी माऊलींच्या समाधी मंदिरात भजन करीत प्रदक्षिणा करतील. त्यानंतर घाट परिसरात इंद्रायणी पूजन आणि ब्रह्मवृंदाच्या मंत्रोच्चारात आरतीला प्रारंभ करण्यात येईल. माऊलींची आरती तसेच संत तुकाराम महाराजांची आरती होईल. पसायदानाने सोहळ्याची सांगता होईल.
या कार्यक्रमाची जबाबदारी विश्वस्त ॲड. रोहिणी पवार यांच्याकडे देण्यात आली आहे. याबाबत ॲड. पवार यांनी सांगितले की, ‘‘संत ज्ञानेश्वर महाराजांच्या जीवनात इंद्रायणी नदीला अत्यंत महत्त्वाचे स्थान आहे. भारतातील गंगा, गोदावरीला जसे पावित्र्य लाभले आहे, त्याचप्रमाणे संप्रदायात इंद्रायणी नदीचे स्थान अद्वितीय आहे. या पावन परंपरेला अनुसरून देवस्थान विश्वस्त समितीने यावर्षी आरतीचा भव्य उत्सव करण्याचा संकल्प केला.’’