आळंदी ग्रामीण हद्दीत ‘भागमभाग’

आळंदी,ता.१६ : खेडच्या पश्चिम पट्ट्यात बिबट्याचा उच्छाद रोजच पाहायला मिळत आहे. मात्र, आता पूर्व पट्ट्यातील आळंदीसारख्या शहरी भागातही बिबट्याचा वावर दिवसाढवळ्या सुरू झाला. मंगळवारी (ता. १६) भर दुपारी दोनच्या सुमारास आळंदी ग्रामीण भागातील माळरानावर बिबट्या दिसला तर नागरी वस्तीकडे तो सैरावैरा पळत होता. तर त्याच्यामागे काही नागरिकही पळत होते.
मागील तीन दिवसांपूर्वी बिबट्याने आळंदी शहरालगत असलेल्या एका मंगलकार्यालामागील उसाच्या शेतात शेळीचा फडशा पाडला होता. ही घटनाही भर दुपारी साडेतीनच्या सुमारास घडली होती. दरम्यान, विश्रांतवड परिसरात हा बिबट्या फिरत असून मागील दोन दिवस नागरिकांना दिसत आहे. विश्रांतवड हे वारकरी संप्रदायासाठी ऐतिहासिक ठेवा आहे. याठिकाणी चांगदेव महाराजांनी संत ज्ञानेश्वर माऊलींना भेट देण्यासाठी वाघावर बसून आदल्या दिवशी मुक्काम केला असल्याची आख्यायिका आहे. यामुळे आळंदी देवस्थानने या भागात सुधारणा केल्याने अनेक भाविक दर्शनासाठी येतात. आजूबाजूच्या परिसरात प्लॉटिंग झाल्याने ५०० पेक्षा अधिक घरेही बांधण्यात आलेली आहे. जवळच ठाकरवाडीची जिल्हापरिषद शाळा आहे. यामुळे अशा लोकवस्तीत बिबट्या शिरल्याने नागरिकांचे आता दिवसाही फिरणे बंद होत आहे. रात्री उशिराने कामावरून येणाऱ्यांच्या मनात भीती निर्माण झाली आहे. लहान मुलांचे खेळणे बंद झाले तर सकाळचा मॉर्निंग वॉकही अनेकांनी या भागात बंद केला आहे. आळंदीसह चऱ्होली खुर्द, बुद्रुक, धानोरे, मरकळ, कोयाळी, केळगाव, धानोरे भागात बिबट्याचा वावर वाढला आहे. दरम्यान, मंगळवारी सायंकाळी पाचच्या सुमारास वनविभागाचे कर्मचारी बिबट्या आलेल्या ठिकाणास भेट दिली. तसेच नागरिकांना अधिक सतर्क राहण्याच्या सूचना दिला. यावेळी स्थानिक रहिवासीयांनी बिबट्याला कैद करण्यासाठी पिंजरा लावण्याची मागणी केली. यावेळी पिंजरा लावण्यात येणार असल्याचे वनविभाग कर्मचाऱ्यांकडून सांगण्यात आले. तसेच बिबट्या दिसताक्षणी दक्षता काय घ्यायची याचेही मार्गदर्शन केले.