आळंदीत मतमोजणी नगरपरिषद कार्यालयात

आळंदी, ता. १९ : आळंदी नगरपरिषदेच्या निवडणुकीची मतमोजणी प्रक्रिया येत्या रविवारी (ता. २१) सकाळी दहा वाजल्यापासून सुरू होणार आहे. ही संपूर्ण प्रक्रिया नगरपरिषद कार्यालयाच्या मुख्य सभागृहात पार पडणार आहे. मतमोजणी प्रक्रिया अत्यंत पारदर्शक, सुरक्षित आणि सुरळीतपणे पार पाडण्यासाठी निवडणूक प्रशासनाकडून जय्यत तयारी केली आहे. त्यासाठी ३८ अधिकारी आणि १५ कर्मचाऱ्यांची नियुक्ती केली आहे. त्यांना आवश्यक ते प्रशिक्षण देण्यात आल्याची माहिती निवडणूक निर्णय अधिकारी जयराज देशमुख आणि सहाय्यक निवडणूक निर्णय अधिकारी माधव खांडेकर यांनी दिली.
आळंदी नगरपरिषदेच्या नगराध्यक्षपदासाठी तसेच एकूण २१ जागांपैकी २० जागांसाठी मतदान प्रक्रिया पार पडली होती. यामध्ये प्रभाग आठमध्ये सुजाता तापकीर (भाजप) बिनविरोध निवडून आलेल्या आहेत. मतमोजणी केंद्रावर कडेकोट पोलीस बंदोबस्त तैनात करण्यात आला असून, केवळ अधिकृत पास धारकांनाच प्रवेश दिला जाईल.