आळंदी गावठाणात तीन दिवस नाही पाणी

आळंदी, ता. २३ : निवडणुकीच्या धामधुमीत प्रशासन व्यस्त असल्याने माऊली मंदिर परिसरात तब्ब्ल तीन दिवस बंद नळाला पाणी आले नाही. यामुळे आळंदी गावठाणातील नागरिकांची पाण्यावाचून गैरसोय सहन करावी लागली. आळंदी नगर परिषद हद्दीतील गावठाण भागातील मंदिर परिसर, चावडी चौक, पालिका चौक भागात शनिवारी (ता. २०) नगर परिषदने पाणी पुरवठा केला होता. यानंतर दिवसाआड होणारा पाणीपुरवठा तीन दिवस झाले नाही. गावठाणात व्यापारी, नागरी वस्ती आणि मंगल कार्यालय असून ते पूर्णपणे पालिकेच्या पाणी पुरवठ्यावर अवलंबून आहेत. रविवारी (ता. २१) मतमोजणी असल्याने प्रशासन व्यस्त होते. मात्र, किमान आज सकाळी तरी पाणी सोडणे गरजेचे होते. पालिकेत याबाबत विचारणा केली असता उडवाउडवाची उत्तरे दिली जात आहेत.