बाजारभावाअभावी कांदा उत्पादक मेटाकुटीला

आळेफाटा, ता.२१ : अतोनात कष्ट करूनही कांद्याला रास्त बाजारभाव मिळत नसल्यामुळे जुन्नर तालुक्यातील कांदा उत्पादक मेटाकुटीला आला आहे. विक्रीतून उत्पादन खर्चही निघत नसल्याने शेतकरी आर्थिक अडचणीत सापडला आहे.
जुन्नरच्या पूर्व भागातील गावांमध्ये मोठ्या प्रमाणात कांदा लागवड केली जाते. शेतकऱ्यांच्या कांद्याला रास्त भाव मिळत नसल्याने कांदा उत्पादक आर्थिक संकटात सापडला आहे. सध्या कांद्याला किलोला फक्त १० ते १३ रुपये बाजारभाव मिळत आहे. परंतु वातावरणात नेहमी होणारे बदल यामुळे वेळोवेळी करावी लागत असलेली औषधे फवारणी, खतांच्या वाढलेल्या किंमती यामुळे शेतकरी त्रस्त झाला आहे.
दरम्यान, जुन्नर कृषी उत्पन्न बाजार समितीच्या आळेफाटा या ठिकाणी रविवारी झालेल्या बाजारात एक नंबर कांद्यास दहा किलोस ११० ते १३० बाजारभाव मिळाला‌. दोन नंबरला ९० ते ११० रुपये बाजारभाव मिळाला तर तीन नंबर कांद्यास दहा किलोस ७० ते ९० रुपये बाजारभाव मिळाला तर चिंगळी कांद्यास दहा किलोस ४० ते ८० रुपये बाजारभाव मिळाला आहे.

कांदा उत्पादनाचा खर्च दिवसेंदिवस वाढत आहे. खते, औषधे यांच्या किमती भरमसाट वाढलेल्या आहेत. लागवडीपासून काढणीपर्यंत मोठा खर्च येत आहे. यामध्ये औषधे, खते, मजुरांचे दर देखील वाढलेले आहेत तसेच कांदा निर्यात थांबविल्यामुळे कांद्याचे बाजारभाव कोसळले असल्याने शासनाने निर्यातबंदी उठवून उत्पादकाला रास्त बाजारभाव देण्यात यावा नाहीतर कांद्यालादेखील खर्चाच्या प्रमाणात हमीभाव द्यावा, अशी कांदा उत्पादक शेतकऱ्यांनी मागणी आहे.
- गणेश गुंजाळ, शेतकरी