जिल्हा पातळीवर हरिपाठ मंडळांच्या स्पर्धा

आळेफाटा, ता. २७ : आळे (ता. जुन्नर) येथील श्री क्षेत्र रेडा समाधी मंदिरात पुणे जिल्हा वारकरी साहित्य परिषदेची जिल्हास्तरीय बैठक पार पडली. यावेळी अनेक विषयांवर चर्चा करण्यात आली.
‘‘वारकरी साहित्य परिषद महाराष्ट्र राज्याच्या १४ व्या वर्धापन दिनानिमित्त ११ नोव्हेंबर या दिवशी संपूर्ण राज्यभर संत जनाई, संत मुक्ताई महिला हरिपाठ मंडळांची निर्मिती करून जिल्हा व राज्य स्तरावर भव्य हरिपाठ स्पर्धा आयोजित करण्याचा विठ्ठल पाटील काकाजी यांचा मानस आहे. स्पर्धांचे सर्व नियोजन त्या त्या जिल्हा समितीने करावे. पुणे जिल्ह्यात दोन ठिकाणी स्पर्धा होतील. पुणे ग्रामीण/पुणे महानगरपालिका, पिंपरी चिंचवड महानगरपालिका विभाग तसेच प्रथम क्रमांकासाठी ऋषिकेश हरिद्वार, द्वितीय क्रमांकासाठी कन्याकुमारी, तृतीय क्रमांकासाठी जगन्नाथ पुरी, चतुर्थ क्रमांकासाठी तिरुपती बालाजी, पाचव्या क्रमांकासाठी जयपूर राजस्थान व विशेष पुरस्कारासाठी मथुरा येथे २० महिलांची सहल काढण्यात येईल,’’ असे योगिनी खोत यांनी सांगितले.
यावेळी वारकरी साहित्य परिषदेचे अध्यक्ष भाऊसाहेब हांडे म्हणाले की, ‘‘जुन्नर, आंबेगाव तालुक्यातील स्वतंत्ररीत्या आषाढी वारीसाठी जाणाऱ्या दिंड्यांना अनुदान लाभ मिळावा, यासाठी विशेष प्रयत्न करत आहे. तसेच वृद्ध कलावंत मानधन योजनेत अनेक वारकऱ्यांना लाभ मिळवून दिला आहे.’’
तसेच पुणे महिलाध्यक्षा सविता गवते, उपजिल्हाध्यक्ष माऊली कुंजीर, गंगाराम डुंबरे आदींनीही मनोगत व्यक्त केले. याप्रसंगी जुन्नर तालुका कार्यकारी अध्यक्ष म्हणून अरुण गुंजाळ यांची, तर जुन्नर तालुका विभाग प्रमुख म्हणून माधव बुट्टे यांची नेमणूक करण्यात आली. बैठकीचे नियोजन अरुण गुंजाळ व जिल्हा सचिव तान्हाजी महाराज खराडे यांनी केले.