राजुरीत रविवारपासून हरिनाम सप्ताह

आळेफाटा, ता. १३ : राजुरी येथे श्री हनुमान उत्सवाच्या निमित्ताने रविवार (ता. १७) पासून अखंड हरिनाम सप्ताहाचे आयोजन केले आहे.
राजुरी (ता. जुन्नर) येथील श्रावण मासातील हनुमान उत्सवानिमित्ताने गुरूवर्य कोंडेजी बाबा डेरे यांच्या कृपा आशीर्वादाने आणि तुळशीराम महाराज सरकटे यांच्या मार्गदर्शनाखाली रविवारी अखंड हरिनाम सप्ताहाचे आयोजन तसेच विविध कार्यक्रमांचे आयोजन केले आहे.
यामध्ये दैनंदिन कार्यक्रमामध्ये काकडा, तुकाराम महाराज गाथा भजन, हरिपाठ होणार आहे. तसेच दररोज रात्री सात ते नऊ या वेळेत विशाल महाराज हाडवळे (राजुरी), ज्ञानेश्‍वर महाराज झोळ (करमाळा), कबीर महाराज आतार (खेड शिवापूर) राजेंद्र महाराज सदगीर (संगमनेर), महाराज पाटील (बार्शी), केशव महाराज मुळीक (इंदापूर), उमेश महाराज दशरथे (आळंदी), संदीप महाराज डुंबरे (राजुरी मुंबई) यांची कीर्तन सेवा होणार आहे. या कार्यक्रमाचा लाभ घ्यावा अशी विनंती हनुमान देव आणि इतर देवस्थान ट्रस्टच्या वतीने करण्यात आली आहे.