‘औद्योगिक गरजेनुसार तंत्रज्ञान आत्मसात करा’

आळेफाटा, ता. १७ : ‘‘औद्योगिक क्षेत्राची गरज ओळखून आणि नवीन तंत्रज्ञान आत्मसात करून भविष्याची गरज भागवण्यासाठी जास्तीत जास्त कौशल्यपूर्ण व गुणवत्तायुक्त अभियंते घडवण्याची जबाबदारी महाविद्यालयाची आहे. विद्यार्थ्यांनी आपले ज्ञान वृद्धिंगत करून घेण्याची जिज्ञासा बाळगली पाहिजे,’’ असे प्रतिपादन उपप्राचार्य पी. बालारामडू यांनी केले.
राजुरी (ता. जुन्नर) येथील सह्याद्री व्हॅली अभियांत्रिकी महाविद्यालयात अभियंता दिन साजरा करण्यात आला. यावेळी बालारामडू बोलत होते. यावेळी संस्थेचे खजिनदार सचिन चव्हाण, मनोज कुमार, प्रा. रांधवण भागवत, ग्रंथपाल उद्धव भारती, प्रा. वैभव नांगरे, प्रा. कविता खताळ, प्रा. कविता खेमनर, प्रा. अक्षय वाघ, प्रा. विशाल औटी आदी उपस्थित होते. वेदिका शिंदे यांनी सूत्रसंचालन, तर प्रतीक्षा सोनवणे यांनी संयोजन केले.