आळे येथील ज्ञानमंदिरात वन्यजीव सप्ताह

आळेफाटा, ता. ६ : आळे येथील ज्ञानमंदिर हायस्कूल आणि कनिष्ठ महाविद्यालयामध्ये वन्यजीव सप्ताहाचे आयोजन करण्यात आले होते.
आळे (ता. जुन्नर) येथील ज्ञानेश्‍वर ग्रामोन्नती मंडळ आळे संतवाडी कोळवाडी संचलित ज्ञानमंदिर हायस्कूल व कनिष्ठ महाविद्यालयात वन्यजीव सप्ताहाचे औचित्य साधून शिवनेरी भूषण माजी सैनिक रमेश गणपत खरमाळे यांचे पर्यावरण जतन संवर्धन आणि पर्यावरणाचे मानवी जीवनातील महत्त्व या विषयावर व्याख्यान घेण्यात आले. यावेळेस त्यांनी सजीव सृष्टीसाठी पर्यावरण हे कसे महत्त्वाचे आहे त्याचप्रमाणे पर्यावरण आणि विज्ञान यांचा परस्पर संबंध कसा आहे याबाबत विद्यार्थ्यांबरोबर संवाद साधला. पृथ्वीवरील मानवाचे अस्तित्व टिकवण्यासाठी वृक्ष लागवड जतन आणि संवर्धन करण्यासाठी उपाययोजना कराव्या असे आवाहन विद्यार्थ्यांना केले. यावेळी स्वाती खरमाळे, प्राचार्य संदीप सुखदेव भवारी, उपप्राचार्य सुनील किसन कोते, शिक्षक वृंद आणि विद्यार्थी उपस्थित होते. कार्यक्रमाचे प्रास्ताविक ज्ञानमंदिर हायस्कूल, कनिष्ठ महाविद्यालयाचे प्राचार्य संदीप भवारी यांनी केले. आभार अर्चना भारती यांनी मानले.