आळेफाटा येथील बाजारात कांद्याची विक्रमी आवक

आळेफाटा, ता. १ : जुन्नर कृषी उत्पन्न बाजार समितीच्या आळेफाटा येथील उपबाजारात शुक्रवारी (ता.३१) २७ हजार ९९५ कांदा पिशव्यांची विक्रमी आवक झाली. कांद्यास दहा किलोस २२१ रुपये बाजारभाव मिळाला.
मोढ्यांत एक नंबर सुपर गोळा कांद्यास दहा किलोस १८० ते २२१, एक नंबरला १६० ते १८०, दोन नंबरला १४० ते १६०, तीन नंबरला १२० ते १४० तर बदला, चिंगळी कांद्यास ५० ते ९० रुपये बाजारभाव मिळाला, अशी माहिती सभापती संजय काळे उपसभापती प्रीतम काळे, सचिव रूपेश कवडे, व्यवस्थापक दीपक म्हस्करे यांनी दिली.
दरम्यान, दिवसेंदिवस शेतकऱ्यांनी साठवून ठेवलेला कांदा सडत असल्याने येथील बाजार समितीत शुक्रवारी मोठ्या प्रमाणावर कांद्याची आवक झालेली असताना देखील बाजारभावात किलोमागे एक ते दोन रुपयांनी वाढ झालेली दिसून येत आहे.