आळे येथे ‘वंदे मातरम’ गीताचे सामूहिक गायन

आळेफाटा, ता. ७ ः आळे (ता.जुन्नर) येथील बाळासाहेब जाधव महाविद्यालयात वंदे मातरम गीताच्या १५० वर्षांनिमित्त सामूहिक गायनाचा कार्यक्रम पार पडला.
भारतीय स्वातंत्र्यलढ्यातील कोट्यवधी भारतीयांचे स्फूर्तीगान असलेले वंदे मातरम हे सर्व भारतीयांसाठी वेदमंत्रापेक्षाही अधिक पवित्र आहे. या राष्ट्रगीताच्या निर्मितीला १५० वर्षांच्या पूर्ततेनिमित्त आळे येथील ज्ञानेश्वर ग्रामोन्नती मंडळ संचलित बाळासाहेब जाधव कला, वाणिज्य व विज्ञान महाविद्यालयाच्या राष्ट्रीय सेवा योजना विभागातर्फे वंदे मातरम गीताचे सामूहिक गायन करण्यात आले.
यावेळी विद्यार्थ्यांना मार्गदर्शन करताना प्राचार्य डॉ. प्रवीण जाधव यांनी सांगितले की, ‘‘सुप्रसिद्ध बंगाली साहित्यिक बंकिमचंद्र चॅटर्जी यांनी लिहिलेले हे गीत भारतीय स्वातंत्र्यलढ्याचे प्रेरणास्थान ठरले. या गीताच्या जयघोषाने लाखो स्वातंत्र्यसैनिकांनी बलिदान दिले आणि भारताला स्वातंत्र्य प्राप्त झाले. त्यामुळे वंदे मातरम हे गीत भारतीय इतिहासात सुवर्णाक्षरांनी कोरले गेले. तसेच या गीताच्या निर्मितीला १५० वर्ष पूर्ण होत असल्याने ७ नोव्हेंबर २०२५ ते ७ नोव्हेंबर २०२६ या कालावधीत महाविद्यालयात वर्षभर विविध उपक्रम राबविण्यात येणार आहेत.’’
कार्यक्रमाचे सूत्रसंचालन मराठी विषयाचे प्रा. योगेश यांनी केले. प्रास्ताविक राष्ट्रीय सेवा योजनेचे कार्यक्रम अधिकारी डॉ. जयसिंग गाडेकर यांनी केली. तर, प्रा. विकास पुंडे यांनी आभार मानले. या प्रसंगी विद्यार्थी, प्राध्यापक व शिक्षकेतर कर्मचारी उपस्थित होते.