घेवड्याचे १५ गुंठ्यांत एक टन उत्पादन

आळेफाटा, ता. २० : बोरी खुर्द (ता.जुन्नर) येथील शेतकरी बाबाजी बांगर यांनी १५ गुंठ्यांत घेवड्याचे एक टन उत्पादन घेतले आहे. त्यांनी उत्पादन मिळण्यासाठी जमिनीत कुजलेले गांडुळ खत व स्लरी मिसळली. ठिबक सिंचनाचा नियोजनबद्ध वापर केला. यामुळे घेवड्याचे भरघोस उत्पादन मिळाले.

बांगर यांनी उत्पादन घेण्यासाठी २५ हजार रुपये भांडवली खर्च आला. नारायणगावातील बाजारपेठेत त्यांच्या घेवड्याला प्रतिकिलो २० ते ३० रुपये बाजारभाव मिळाला आहे. यातून त्यांना खर्च वजा जाता आठ ते दहा हजार रुपयांचा नफा मिळाला आहे.

घेवड्याचे पीक घेण्यासाठी बांगर यांनी जमीन नांगरून घेतली व एक महिना तापत ठेवली. ती जमीन रोटरून बेड तयार केले. या बेडमध्ये घरी तयार केलेले चांगले कुजलेले गांडुळ खत व स्लरी मिसळून त्यावर ठिबक सिंचन टाकून घेतले. अंकुर या जातीची ६०० ग्रॅम बी आणून फोकले. यावर पाणी भरले. याची लागवड त्यांनी ऑगस्ट महिन्यात केली.

सेंद्रिय खतांमुळे रोपांची योग्य वाढ
लावगडीबरोबर साठी रासायनिक खतांचा वापर न करता फक्त शेण खत व‌ गुळ, गोमुत्र, वारूळाची माती, शेण, ताक यापासून स्लरी तयार केली. वाफ्यात पाणी भरताना सोडल्याचा त्यांना फायदा झाला. सेंद्रिय खतांमुळे रोपांची चांगल्या पद्धतीने वाढ होऊन फळे देखील चांगली आली आहेत.

नारायणगाव या ठिकाणी त्यांच्या घेवड्याला एका किलोला २० ते ३० रुपये बाजारभाव मिळाला आहे. यातून त्यांना खर्च वजा जाता आठ ते दहा हजार रुपयांचा नफा मिळाला आहे.तसेच शेती करत असताना पत्नी सुनीता यांची मोलाची साथ मिळत आहे.
- बाबाजी बांगर, शेतकरी

बांगर यांनी घेवडा या पिकाला लागवडीपासून अतिशय मेहनत घेतली. वेळोवेळी खतांचे डोस, खुरपणी,पाणी देणे,फवारणी हे सर्व वेळेत केल्यामुळे त्यांनी रासायनिक खताचा एक कणही न टाकता सेंद्रिय निविष्ठांचा वापर करून घेवड्याचे चांगल्याप्रकारे पीक घेतले आहे.
- राजश्री नरवडे, कृषी अधिकारी

07478