बेल्हे येथे ‘नर्सिंग कॉलेज’ला मान्यता

बेल्हे, ता. २२ : बेल्हे (ता. जुन्नर) येथे समर्थ शैक्षणिक संकुलात ‘समर्थ इन्स्टिट्यूट ऑफ नर्सिंग’ या नवीन महाविद्यालयास महाराष्ट्र शासन वैद्यकीय शिक्षण व संशोधन संचालनालय मुंबई यांनी शैक्षणिक वर्ष २०२४-२५ पासून सुरू करण्यास मान्यता दिली आहे.

बेल्हे येथील समर्थ शैक्षणिक संकुलात विद्यार्थी वर्गासाठी, जी. एन. एम. (जनरल नर्सिंग ॲण्ड मिडवायफरी) म्हणजेच नर्सिंग या अभ्यासक्रमाची सुविधा उपलब्ध झाली आहे, असे संस्थेचे सचिव विवेक शेळके यांनी सांगितले. विद्यार्थ्यांचा नर्सिंग अभ्यासक्रमाकडे वाढता कल पाहता, संस्थेला जी. एन. एम. (नर्सिंग) अभ्यासक्रमाचे नवीन महाविद्यालय सुरू करण्यास परवानगी मिळालेली आहे. हा अभ्यासक्रम महाराष्ट्र राज्य शुश्रुषा व परावैद्यक शिक्षण मंडळ यांच्याशी संलग्न असणार आहे. या नवीन महाविद्यालयासाठी अत्याधुनिक हॉस्पिटल, सुसज्ज प्रयोगशाळा, विद्यार्थी व विद्यार्थिंनीसाठी स्वतंत्र वसतिगृह, जुन्नर, आंबेगाव इत्यादी प्रमुख महामार्गावरून बसेसची सुविधा संस्थेमार्फत केलेली आहे.
या अभ्यासक्रमास प्रवेश घेण्यासाठी इंग्रजी, भौतिकशास्त्र, रसायनशास्त्र, जीवशास्त्र आदी विषयांसह १२ वी विज्ञान शाखेमध्ये किमान ४५ टक्के गुण मिळवून उत्तीर्ण झालेले विद्यार्थी पात्र आहेत. त्यासाठी एम. एच. नर्सिंग २०२४ ची सीईटी परीक्षा देणे बंधनकारक आहे. यामुळे जुन्नर, पारनेर, संगमनेर, नगर, खेड, आंबेगाव, शिरूर या भागातील विद्यार्थ्यांची फार मोठी सोय होणार असल्याचे कॅम्पस डायरेक्टर प्रा. राजीव सावंत यांनी सांगितले.