पेमदरामधील कला केंद्राला नागरिकांचा विरोध

बेल्हे, ता. २ : पेमदरा (ता. जुन्नर) गावच्या हद्दीत ‘कला केंद्र’ सुरू होणार असल्याचे सांगण्यात येत आहे. त्याला परिसरातील नागरिकांकडून विरोध करण्यात आला आहे.
जुन्नर तालुक्याच्या पूर्व पठार भागावर पुणे व अहिल्यानगर जिल्ह्यांच्या हद्दीत कल्याण-अहिल्यानगर महामार्गावर पेमदरा गाव आहे. या गावच्या हद्दीत संबंधित कला केंद्राचे बांधकाम सुरू आहे. या केंद्राच्या बांधकामाला शासनाची परवानगी नसल्याचे ग्रामस्थांमध्ये चर्चा आहे. कला केंद्र सुरू झाल्यास सामाजिक स्वास्थ्य बिघडण्यासह गुन्हेगारी प्रवृत्ती वाढण्याची शक्यता वर्तविण्यात येत आहे. त्यामुळे नागरिकांचा विरोध झुगारून सुरू असलेले हे काम थांबवून संबंधितांवर शासनाने योग्य ती कारवाई करण्याची मागणी नागरिकांकडून होत आहे. यासंबंधीचे निवेदन पारनेर तहसीलदार यांना देण्यात आले आहे. दरम्यान, मागणीची दखल न घेतल्यास तीव्र आंदोलन करण्याचा इशारा नागरिकांनी दिला आहे.