मंगरूळला ‘पाणंद रस्ते मोजणी’चा प्रारंभ

बेल्हे, ता. ७ : मंगरूळ (ता. जुन्नर) येथे सोमवारी (ता. ६) ग्रामपंचायतीमार्फत ‘पाणंद रस्ते मोजणी’चा प्रारंभ करण्यात आला. गावचे भूमिपुत्र असलेले जमाबंदी आयुक्त व पुण्याचे भूमी अभिलेख संचालक ज्ञानेश्वर खिलारी तसेच जुन्नरचे तहसीलदार सुनील शेळके व तालुका मोजणी अधीक्षक मंगल गवळी यांच्या प्रमुख उपस्थितीत मुख्यमंत्री समृद्ध पंचायतराज अभियान अंतर्गत कामास सुरुवात करण्यात आली.

मंगरूळ गावच्या हद्दीतील सर्व रस्त्यांची गावच्या भूमिअभिलेख नकाशावर नोंद होणार आहे. या कार्यक्रमप्रसंगी पुणे जिल्हा दूध उत्पादक संघाचे संचालक बाळासाहेब खिलारी, मंडल अधिकारी योगिता पिंगळे, तंटामुक्त समितीचे अध्यक्ष अर्जुन खराडे, उपाध्यक्ष नारायण खुटाळ, माजी सरपंच  भानुदास खराडे, माजी उपसरपंच चंद्रकांत ढगे, रमेश औटी, उपसरपंच मनीषा खिलारी आदी मान्यवरांसह ग्रामस्थ उपस्थित होते. यावेळी जुन्नर पंचायत समिती तसेच तहसील विभागाचे कर्मचारीही उपस्थित होते. मंगरूळ गावाने मुख्यमंत्री समृद्ध पंचायतराज अभियानामध्ये भाग घेतला आहे. दरम्यान या संदर्भातील पुरस्कार गावाला मिळवण्यासाठी मंगरूळ ग्रामस्थांनी एकी कायम ठेऊन, सर्वांनी सहकार्य करावे असे आवाहन ज्ञानेश्वर खिलारी यांनी यावेळी केले. तसेच पुढील काळात गावात विविध शासकीय योजनांचे शिबिर आयोजन करणार असल्याचे त्यांनी स्पष्ट केले.
प्रवीण खराडे यांनी प्रास्ताविक व सूत्रसंचालन तर उपसरपंच मनीषा खिलारी यांनी आभारप्रदर्शन केले.

02647