आणे येथे तरुणावर बिबट्याचा हल्ला

बेल्हे, ता. २८ : आणे (ता. जुन्नर) येथे जांभळंदरा परिसरात आज (ता. २८) सकाळी मूरघास बनवण्यासाठी शेतात मका कापण्यासाठी गेलेल्या एका तरुणावर बिबट्याने हल्ल्याचा प्रयत्न केला. यावेळी बिबट्याने पंजा मारल्याने सोमनाथ आगविले (वय-२६) हा संबंधित तरुण किरकोळ जखमी झाला आहे.
याबाबत समजलेल्या माहितीनुसार, आणे येथे जांभळंदरा परिसरात चिनू दाते यांच्या शेतात मका कापून मूरघास करण्याचे काम सोमनाथ आगविले (वय २६) या तरुणाने घेतले होते. यावेळी मक्याच्या शेतात असलेल्या बिबट्याने त्याच्यावर अचानक झेप घेऊन डोक्यावर पंजा मारत हल्ल्याचा प्रयत्न केला. मात्र त्याने आरडाओरड करताच बिबट्याने पळ काढला. बिबट्याच्या पंजाच्या नख्या डोक्याला लागल्याने तो किरकोळ जखमी झाल्याचे सांगण्यात आले. त्याच्यावर बेल्हे येथील प्राथमिक आरोग्य केंद्रात प्रथमोपचार करून, पुढील उपचारासाठी नारायणगाव येथे पाठविण्यात आल्याचे बेल्हे प्राथमिक आरोग्य केंद्राकडून सांगण्यात आले.