उत्पादन वाढवण्यासाठी ठिबक, एआय वापरा

पारगाव, ता. २८ : शेतकऱ्यांनी अनुदान मिळवण्यासाठी नव्हे तर शेतातील उसाचे उत्पादन वाढवण्यासाठी ठिबक सिंचन व एआय तंत्रज्ञानाचा वापर करावा त्यासाठी भीमाशंकर साखर कारखाना सर्व प्रकारची मदत करेल, अशी माहिती भीमाशंकर सहकारी साखर कारखान्याचे उपाध्यक्ष प्रदीप वळसे पाटील यांनी दिली.
अवसरी बुद्रुक (ता. आंबेगाव) येथील विठ्ठल रुक्मिणी मंदिरात शनिवारी (ता.२८) भीमाशंकर साखर कारखान्यामार्फत आयोजित ऊस विकास मेळाव्यात ऊस विकास योजना, आडसाली लागवड, व्यवस्थापन आणि ए आय तंत्रज्ञानावर आधारित ऊस शेती या विषयावर मार्गदर्शन करताना प्रदीप वळसे पाटील बोलत होते.
यावेळी भीमाशंकरचे संचालक बाबासाहेब खालकर, रामचंद्र,ढोबळे, शांताराम हिंगे, मच्छिंद्र गावडे, माऊली आस्वारे, रामहरी पोंदे, पुष्पलता जाधव, प्रिया बाणखेले, माजी उपाध्यक्ष ज्ञानेश्वर गावडे, दिलीप लोखंडे, अवसरी बुद्रुकच्या सरपंच सारिका हिंगे, उपसरपंच सरपंच अनिल हिंगे, गावडेवाडीचे सरपंच विजय गावडे, उपसरपंच राजू गावडे, ऋषिकेश गावडे, टाव्हरेवाडीचे माजी सरपंच उत्तम टाव्हरे, गणेश बांगर, नवनाथ टाव्हरे व शेतकरी मोठ्या संख्येने उपस्थित होते.
यावेळी वळसे पाटील बोलताना पुढे म्हणाले की, शेतकऱ्यांनी पारंपरिक पद्धतीने ऊस लागवड करू नये. कारखान्याचे कर्मचारी ए आय तंत्रज्ञानाची माहिती शेतकऱ्यांना बांधावर जाऊन देण्याचे काम करतील तसेच भीमाशंकर साखर कारखाना दरवर्षी प्रत्येक सभासदाला प्रत्येकी एक फळ झाडाचे रोप देण्याचा विचार करत आहे.

भीमाशंकरचे मुख्य शेतकी अधिकारी दिलीप कुरकुटे, ऊस पुरवठा अधिकारी दिनकर आदक, ऊस विकास अधिकारी सोमेश्वर दीक्षित, कृषी विभागाच्या सहाय्यक कृषी अधिकारी छाया चव्हाण यांनी मार्गदर्शन केले. सचिन पानसरे, सोमनाथ जाधव, योगेश आदक, प्रतीक भोर, धनेश गवारी यांनी मेळाव्याचे नियोजन केले होते. अशोक भोर यांनी सूत्रसंचालन तर मच्छिंद्र गावडे यांनी आभार मानले.
05775