नैवद्यासाठी लागणाऱ्या भाज्या कडाडल्या

पारगाव, ता. १०: पितृपंधरवडा सुरू झाल्याने नैवद्यासाठी लागणाऱ्या भाज्यांना मागणी वाढल्याने बाजारात भाज्यांचे बाजारभाव कडाडले. पितृपंधरवडा सुरू झाला आहे. सध्या पितृपक्ष पंधरवडा सुरू असल्यामुळे पालेभाज्या व फळभाज्यांची आवक वाढली आहे.
लोणी (ता. आंबेगाव) येथील बुधवारी (ता.१०) आठवडे बाजारात भाजीपाल्यांचे आकाशाला भिडले होते. पितृपक्षामुळे सर्व प्रकारच्या पालेभाज्या फळभाज्या व काही विशिष्ट भाज्यांना मागणी वाढली आहे. यामुळे इतर भाज्यांचे देखील भाव कडाडले आहेत. एरवी अगदी किरकोळ भावात उपलब्ध होणाऱ्या भाज्या सध्या ८० ते १०० रुपये किलो या दराने मिळू लागल्या आहेत.
पितृपक्षात पितरांना नैवेद्य दाखविताना गवार, भोपळा, मेथीची भाजी ही महत्त्वाची भाजी असल्याने त्यांचा भाव सर्वाधिक आहे. एरवी सर्वत्र गवार ४० ते ५० रुपये किलो मिळणारी सध्या ८० ते ९० रुपये किलो मिळू लागली आहे. हीच परिस्थिती चक्की व डांगर भोपळा यांची झालेली आहे. कारले, चवळी, भेंडी, अळू्चे पान, दोडके या भाजीपाल्यांसाठी मोठ्या प्रमाणात पैसे मोजावे लागत आहे. अळूची ५ पानांची जुडी १५ ते २० रुपये दर देवून विकत घ्यावी लागत आहे, अशातच सध्या कोंथिबीर, मेथी, शेपू आणि पालक जुडीचे दर ५० रुपयांवर पोचले आहेत तर फ्लॉवर ६० ते ८० रुपये किलो दराने विकली जात आहे.

फळभाज्या - बाजारभाव (प्रतिकिलो रुपयांत) गवार : ८०, घोसाळी-८०, कारले - ८०, लालभोपळा (चक्की)-१० ते २० रुपयाला एक खाप, लालदेठ : ४० ते ५०, हिरवी मिरची : ८०, बटाटा : ३० ते ४०, अळूचे पान-१५-२० (जुडी), मेथी ४०-५० रुपये (जुडी), कोथिंबीर ४०-५० जुडी

06061