सांगणोरेमध्ये ‘अनिवार्य संलग्नता’ उपक्रम

आपटाळे, ता. १७ : जुन्नर तालुक्याच्या पश्चिम आदिवासी भागातील पिंपळगाव जोगा धरण परिसरातील सांगणोरे येथे ता. ९ ते १५ जुलैदरम्यान यशदा प्रशिक्षण संस्थेच्या माध्यमातून ‘अनिवार्य संलग्नता’ या उपक्रमाअंतर्गत वर्ग एकच्या अधिकाऱ्यांनी आदिवासी संलग्नता कालावधी पूर्ण केला. या उपक्रमाअंतर्गत वर्ग एकचे सहा अधिकारी सहभागी झाले होते.
राज्यातील वर्ग एक अधिकाऱ्यांना प्रशिक्षण देणाऱ्या यशवंतराव चव्हाण विकास प्रशासन प्रबोधिनी, पुणे यांच्या माध्यमातून या उपक्रमाचे आयोजन करण्यात येते. यामध्ये शीतल घोलप (उपजिल्हाधिकारी), सागर वाघमारे (तहसीलदार), अनिल काळे (सहाय्यक राज्यकर आयुक्त), प्रेरक उजगरे (शिक्षणाधिकारी), गौरव बंग (सहाय्यक राज्यकर आयुक्त) व रूपा मोहितकर (बाल विकास प्रकल्प अधिकारी) या अधिकाऱ्यांनी संलग्नता कालावधी पूर्ण केला. या कालावधीत अधिकाऱ्यांनी गावातील अंगणवाडी, प्राथमिक शाळा, बचत गट, तलाठी कार्यालय, रेशन दुकान, कृषी सहायक कार्यालय आणि ग्रामीण आरोग्य उपकेंद्राला भेट देऊन कामकाजाची माहिती घेतली.