सुराळे येथे सायकल बँक सुरू

आपटाळ, ता. १६ ः सुराळे (ता. जुन्नर) येथील जिल्हा परिषद प्राथमिक शाळेमध्ये विद्यार्थ्यांसाठी सायकल बँक सुरू करून स्वातंत्र्यदिन साजरा करण्यात आला. याची माहिती मुख्याध्यापक खंडेराव ढोबळे यांनी दिली.
ग्रामपंचायत कार्यालयात सदस्या शेवंता केदारी व पुष्पा केदारी यांनी तर जिल्हा परिषद प्राथमिक शाळेत पोलिस पाटील अशोक मातेले यांनी ध्वजवंदन केले. राष्ट्रध्वजाची व एकल महिला सन्मानाची प्रतिज्ञा घेण्यात आली. यावेळी सुराळे ग्रामपंचायत सदस्यांच्या वतीने तीन किलोमीटर अंतरावरून शाळेत येणाऱ्या वैशाली दत्तात्रेय नायकोडी या विद्यार्थिनीला पाच हजार रुपये किमतीची सायकल भेट देऊन ‘सायकल बँक’ या संकल्पनेची सुरुवात करण्यात आली.
कृषी उत्पन्न बाजार समितीचे संचालक संतोष चव्हाण यांच्या वतीने विद्यार्थ्यांना दप्तरांचे वाटप करण्यात आले. तर, सेवानिवृत्त शिक्षक धोंडू जुन्नरकर यांच्या वतीने वह्या, चित्रकला वही आदी शैक्षणिक साहित्याचे वाटप करण्यात आले. याप्रसंगी कविता शेटे, सुनिता चव्हाण, रुपा महाबरे यांचा एकल महिला म्हणून सन्मान करण्यात आला. तसेच, मुख्याध्यापक खंडेराव ढोबळे व शिक्षक पंढरीनाथ उतळे यांनी कायम ठेव योजनेसाठी प्रत्येकी अकरा हजार रुपयांची देणगी दिली. यावेळी सरपंच निता घोगरे, उपसरपंच ॲड. सचिन चव्हाण, खरेदी विक्री संघाचे संचालक रामदास चतुर, रमेश मातेले, बन्सी चतुर, उत्तम शेटे, ग्रामसेविका अश्विनी आजादे, शिक्षक मंगल मरभळ, सुनिल डोळस यांसह ग्रामस्थ व विद्यार्थी उपस्थित होते.