ई-पीक पाहणी वेळेत पूर्ण करा

आपटाळे : केंद्र शासनाच्या आधारभूत किंमत खरेदी योजनेचा लाभ घेण्याकरिता तालुक्यातील सर्व शेतकऱ्यांनी आपल्या पिकांची ई-पीक पाहणी शासनाने दिलेल्या कालावधीत पूर्ण करावी, असे आवाहन जुन्नर तालुका कृषी उत्पन्न बाजार समितीचे सभापती ॲड. संजय काळे व सचिव रूपेश कवडे यांनी केले आहे.
यंदाच्या हंगाम २०२५ - २६ मध्ये केंद्र शासनाने निश्चित केलेल्या आधारभूत दरानुसार राज्यात नाफेड व एनसीसीएफच्या वतीने पणन महासंघामार्फत राज्यात कडधान्य व तेलबियांची (मुंग, उडिद, सोयाबीन व तुर) खरेदी करण्यात येणार आहे. आधारभूत दराने खरेदी करण्याकरीता ई-पीक पाहणी असलेला सात बारा उतारा आवश्यक आहे. तसेच सदर खरेदी प्रक्रिया ही शेतकऱ्यांच्या हितासाठी पारदर्शक, कार्यक्षम व संपूर्णपणे ऑनलाइन प्रणालीद्वारे पार पाडली जाणार आहे.