खामगावमध्ये कुत्र्यावर हल्ला

आपटाळे, ता. ९ : खामगाव (ता. जुन्नर) येथे बिबट्याच्या उपद्रवामुळे ऊस तोडणी कामगारांसोबतच स्थानिक शेतकऱ्यांमध्ये भीतीचे वातावरण निर्माण झाले आहे. वनविभागाने येथील बिबट्यांना तत्काळ जेरबंद करावे, अशी मागणी लोकनियुक्त सरपंच नीलम वायाळ-घोलप यांनी केली.
खामगाव व परिसरातील गावांमध्ये सध्या ऊस तोडणीची कामे सुरू आहेत. ऊस तोडणीच्या कामासाठी आलेले ऊस तोडणी कामगार येथील गावात जाणाऱ्या वेशीच्या परिसरात वास्तव्यास आहेत. ऊस तोडणी कामगार, महिला व त्यांची मुले यासह जवळपास तीस ते चाळीस नागरिक येथे वास्तव्यास आहेत. शनिवारी (ता. ८) रात्री आठच्या सुमारास बिबट्याने येथील कुत्र्यावर हल्ला केला. यावेळी ऊस तोडणी कामगारांची मुले बाहेर खेळत होती. बिबट्या नजरेसमोरील शेतामध्ये बराच वेळ घिरट्या घालत असल्याचे नागरिकांनी पाहिल्यानंतर सरपंच नीलम वायाळ घोलप यांनी तातडीने या परिसरात भेट दिली. यावेळी त्यांनी वनविभागाचे अधिकाऱ्यांना संपर्क केल्यानंतर वनपाल कृष्णा दिघे यांनी तातडीने घटनास्थळी भेट दिली. वनविभागाच्या वतीने येथे पिंजरा लावण्यात आला आहे.