कुसूर येथे बिबट्या जेरबंद

जुन्नर, ता. ६ : कुसूर (ता. जुन्नर) येथे सहा वर्षे वयाचा पूर्ण वाढ झालेल्या बिबट्याला जेरबंद करण्यात वनविभागाला यश आले आहे. शनिवारी (ता. ६) सकाळी आठच्या सुमारास बिबट्याला पिंजऱ्यात अडकल्याची माहिती वनपरिक्षेत्र अधिकारी प्रदीप चव्हाण यांनी दिली. दरम्यान, अजून बिबटे या परिसरात फिरत असल्याचे नागरिकांनी सांगितले. किल्ले शिवनेरीच्या परिसरातील कुसूर गावच्या हद्दीतील इनामवाडी , तलाखी व कुसूर गावठाण या भागात बिबट्याचा मुक्त वावर असल्याचे दिसून येते. किल्ले शिवनेरीचा दाट झाडींचा परिसर, उसाचे क्षेत्र यामुळे बिबट्याला लपण्यास जागा मिळत असल्याने बिबट्याचा वावर या भागात वाढला आहे. येथील महाबरे वस्तीच्या परिसरात गेल्या काही दिवसांपासून नागरिकांना बिबट्याचे राजरोसपणे दर्शन होत असल्याने नागरिकांमध्ये भीतीचे वातावरण निर्माण झाले होते. वनविभागाने बिबट्याला जेरबंद करण्यासाठी या परिसरात दोन पिंजरे लावले होते. यापैकी एका पिंजऱ्यात बिबट्या जेरबंद झाला. वनपाल नितीन विधाटे, संतोष भालेकर, सूरज मोधे, अनिल मोधे, तुषार निगळे, दत्ता निगळे, वन मजूर सांगडे यांनी यासाठी प्रयत्न केले.