मुळशीतील वारकऱ्यांना धर्मशाळा बांधून देणार : मांडेकर

भुकूम, ता. २३ : ‘‘मुळशीत वारकरी संप्रदायाची आळंदीतील धर्मशाळा मोडकळीस आली आहे. तेथे नव्याने एक कोटी खर्च करून धर्मशाळा बांधून देण्यात येईल. तालुक्यात वारकरी संप्रदायाने आपल्या पाठीशी राहावे.’’ असे आमदार शंकर मांडेकर यांनी सांगितले.
मुळशी वारकरी संप्रदायाची तालुक्याची बैठक पुणे येथील खिलारीवाडीत आयोजित करण्यात आली होती, त्यावेळी ते बोलत होते. रथाच्या मागे दिंडी क्रमांक ९६ मुळशीची दिंडी चालत असते. तालुक्यातील ९१ गावातील वारकरी दिंडीत सहभागी असतात असे दिंडीचे मुख्य विश्‍वस्त मारुती धुमाळ यांनी सांगितले. यावेळी नंदकुमार वाळंज यांनी धर्मशाळेच्या प्लॅनबाबत माहिती दिली. शांताराम इंगवले, रवींद्र कंधारे, प्रकाश भेगडे, सचिन खैरे, सुरेश पारखी, अंकुश वाशिवले, तात्यासाहेब देवकर, कोमल वाशिवले, गणपत मेंगडे यांनी धर्मशाळेसाठी आर्थिक सहकार्य करण्याचे आश्‍वासन दिले. दिंडीसाठी लोणंद, वेळापूर येथे भुकूम ग्रामस्थांनी जागा दिल्याची माहिती दशरथ वहाळे आणि मारुती चोरघे यांनी दिली. खिलारे कुटुंबीयांच्या वतीने अमृतसेन, योगश खिलारे यांनी वारकऱ्यांचे स्वागत केले. दिंडी दरवर्षी येथे दोन दिवस मुक्कामाला असते. दिंडीसाठी केंद्रीय सहकार्य मंत्री मुरलीधर मोहोळ यांनी औषधाचे किट व प्रत्येकास बॅग दिली. उच्च तंत्रज्ञान शिक्षण मंत्री चंद्रकांत पाटील यांच्यावतीने ५० बिछाने, दोन तंबू देण्यात आले. आमदार शंकर मांडेकर यांनी पाच हजार लिटर पाणी, कृष्णा पानसरे यांनी एक तंबू, तसेच औषधाचे किट अनेकजणांनी दिल्याचे दिंडीचे पदाधिकारी नरहरी माझीरे यांनी सांगितले.