हिरवेगार डोंगर, धबधब्यांची पर्यटकांना साद

भुकूम, ता. ९ : हिरवाईने नटलेले रिहे खोऱ्यातील बंधारे, हिरवेगार डोंगर, धबधबे पर्यटकांना साद घालीत आहेत. यामुळे रविवारी तसेच सुटीच्या दिवशी
पावसाळी पर्यटनासाठी पर्यटकांची गर्दी होत आहे.
मुळशी तालुक्यात पर्यटकांची नेहमी गर्दी होत असते. तालुक्यात मुळशी धरण परिसर, सहारा इंडिया, लवासा, मुठा खिंड, माले येथील परिसरात निसर्गाचा आनंद घेण्यासाठी पूर्वी पासून पर्यटक येत असतात. त्यामुळे या भागात राहण्यासाठी हॉटेल्स, नाष्टाची छोटी हॉटेल्स, मक्याची कणस्यांच्या टपरी आदी व्यवसाय पावसाळी पर्यटनामुळे बहरात आहेत.
रिहे बंधाऱ्यावरून दिसणारे निसर्गाचे विहंगम दृष्य, बंधाऱ्याच्या पाण्याच्या बाजूने भात लावणी केलेली हिरवीगार भातशेती, सभोवती हिरवा शालू नेसलेले उंच डोंगर. ओढ्यांचे खळखळून वाहणारे पाणी, असे निसर्ग सौंदर्याचा आनंद घेण्यासाठी पर्यटक गर्दी करीत आहेत.
रिहे खोऱ्यातील आंधळे व कातरखडक येथील उंच डोंगर व त्यावरून वाहणारे धबधबे पाहण्यासारखे आहेत. येथील डोंगर उताराचा भाग व त्यावरील भात लागवड झालेली भात शेती पर्यटकांच्या मनाला आनंद देते. येथील रामेश्वर मंदिर व पिंपोळीचे महादेवाचे मंदिर पर्यटकांच्या आकर्षणाचे केंद्र बनले आहे.

पर्यटनासाठी आटीयन्सची पसंती
पर्यटन करताना हौसी पर्यटक ओढ्याच्या वाहत्या पाण्यामध्ये उतरतात. डोंगरातील पावसामुळे पाण्याचा प्रवाह कधीही वाढू शकतो. यामुळे बंधाराच्या पाण्यात पोहण्याचा प्रयत्न करू नये. यापूर्वी खांबोली येथे दुर्घटना घडल्या आहेत. शेवाळ असलेल्या रस्ता, खडकावर चालू नये.
दरम्यान, रिहे खोरे पिंपरी-चिंचवड, हिंजवडी, वाकड, माण, मारूंजी परिसराजवळ आहे. त्यामुळे येथील आटीयन्सची आठवडा सुट्टीला येथे गर्दी होत असते.
02643