भोर शहरातील अतिक्रमणांवर हातोडा

भोर, ता. १९ : शहरातील मुख्य बाजारपेठ असलेल्या मंगळवार पेठेत रस्त्यावर अतिक्रमण करणाऱ्यांविरोधात नगरपालिका प्रशासनाच्या वतीने शुक्रवारी (ता. १९) पुन्हा एकदा कारवाई करण्यात आली. जानेवारी महिन्यात अतिक्रमणधारकांवर केलेल्या कारवाई केल्यानंतर पुन्हा परिस्थिती जैसे थे झाली होती. त्यामुळे नगरपालिका प्रशासनाने शुक्रवारी कारवाई करून ५६ अतिक्रमणे काढून टाकली.
नगरपालिकेचे मुख्याधिकारी गजानन शिंदे यांच्या मार्गदर्शनाखाली नगरपालिकेचे बांधकाम विभाग प्रमुख समाधान खरात, आरोग्य प्रमुख महेंद्र बांदल, लेखापाल सागर कुऱ्हाडे, शहर समन्वयक शुभम मोहिते, करवसुली अधिकारी सूरज झेंडे आदींनी इतर कर्मचाऱ्यांसमवेत ही कारवाई केली. सकाळी साडेदहा वाजता सुरू झालेली कारवाई दुपारी दोन वाजता पूर्ण झाली. यात नगरपालिका चौक मंगळवार पेठ ते बसस्थानक मार्गावरील रस्त्याच्या दोन्ही बाजूने केलेली अतिक्रमणे हटविण्यात आली. एक जेसीबी व एक ट्रॅक्टरच्या मदतीने कर्मचाऱ्यांनी अतिक्रमण केलेले साहित्य जप्त केले. यातील केवळ दोनच व्यावसायिकांनी दंड भरून आपले साहित्य परत घेतले.

शहरातील मंगळवार पेठेतील मुख्य रस्त्यांवरील दोन्ही बाजूंची अतिक्रमणे काढण्यात आली असून यापुढे ही कारवाई निरंतर सुरू राहणार आहे. रविवारी होणारी मतमोजणी, शहरातील वाहतूक कोंडी आणि मांढरदेवी यात्रेच्या अनुषंगाने नगरपालिका प्रशासनाने हे पाऊल उचलले आहे.
- गजानन शिंदे, मुख्याधिकारी भोर नगरपालिका.

पोलिसांनी गस्त सुरू करावी
शहरातील मुख्य रस्त्यांवर अनेक मोटारचालक आणि दुचाकीस्वार रस्त्यावर गाड्या उभ्या करून खरेदीसाठी थांबतात. त्यामुळे अनेकवेळा वाहतूक कोंडी होऊन नागरिक आणि वाहनचालकांमध्ये वाद होतात. यासाठी वाहतुकीस अडथळा करणाऱ्या वाहनचालकांवर कारवाई करण्यासाठी पोलिसांनी शहरातून गस्त सुरू करावी, अशी मागणी केली जात आहे.