मराठी गीतांचा आस्वाद घेताना बारामतीकर मंत्रमुग्ध

बारामती, ता. २४ : एकाहून एक अजरामर सुरेल मराठी गीते व त्या मागील पार्श्वभूमी ऐकताना बारामतीकर मंत्रमुग्ध झाले होते. ग. दि. माडगूळकर, सुधीर फडके, मास्टर कृष्णराव, वसंत प्रभू, शांता शेळके, पु. ल. देशपांडे, राम कदम, जगदीश खेबूडकर आदींची मराठीतील अजरामर गाणी ऐकताना बारामतीकर त्या काळात जाऊन पोहोचले होते.
येथील एन्व्हॉर्यमेंटल फोरम ऑफ इंडिया व खासदार सुनेत्रा पवार यांच्या संकल्पनेतून रसिक बारामतीकरांसाठी प्रतिबिंब अंतर्गत ‘गीत तुझे स्मरताना- शतजन्म शोधताना’ लाइव्ह इन कॉन्सर्ट हा अजरामर मराठी गीतांचा सुरेल कार्यक्रम शुक्रवारी (ता. २०) येथील ग.दि.मा सभागृहात सादर केला गेला.
अभिनेत्री व कवयित्री स्पृहा जोशी यांचे निवेदन, देवेंद्र भोमे यांचे संगीत संयोजन शमिका भिडे, जयदीप वैद्य, मुक्ता जोशी, आशुतोष मुंगळे, भूषण मराठे यांनी सादर केलेली एकाहून एक सरस सर्व प्रकारातील मराठी गीते, गदिमा, बाबूजी यांचे किस्से, त्यांचे शब्दांवरील प्रभुत्व याचा अडीच तास बारामतीकरांनी मनमुराद आनंद घेतला. गीतरामायणातील काही गीते, गदिमा, बाबूजी यांची गीते, काही लावण्या, काही लोकसंगीत, भक्तिगीते, भावगीते असा सुरेल संगम या कार्यक्रमातून साधला गेला.
रसिक बारामतीकरांना अभिजात संगीत अनुभवता यावे, नामवंतांची गीते, त्या मागचा इतिहास माहिती व्हावा आणि पुन्हा एकदा नव्याने या गीतांचा आनंद घेता यावा या उद्देशाने बारामतीकरांसाठी या कार्यक्रमाचे आयोजन केल्याची माहिती खासदार सुनेत्रा पवार यांनी दिली. त्यांच्या हस्ते सर्व कलाकारांचा गौरव केला गेला.