बारामती सादर होणार दर्जेदार कार्यक्रम

बारामती, ता. २८ : येथील बारामती गणेश फेस्टिव्हल पुढील वर्षात रौप्य महोत्सवी वर्ष साजरे करणार असल्याने, आगामी फेस्टिव्हलमध्ये बारामतीकरांना दर्जेदार कार्यक्रमांची मेजवानी उपलब्ध करून द्यावी, अशी सूचना उपमुख्यमंत्री अजित पवार यांनी बारामती गणेश फेस्टिव्हलचे प्रमुख किरण गुजर यांना केली.
यंदाच्या गणेशोत्सवातील बारामती गणेश फेस्टिव्हलचे उद्‍घाटन बुधवारी (ता. २७) अजित पवार व राज्यसभेच्या खासदार सुनेत्रा पवार या हस्ते झाले. त्या प्रसंगी पवार बोलत होते. पुढे बोलताना पवार म्हणाले की, ‘‘बारामतीकरांना गणेशोत्सवाच्या निमित्ताने सांस्कृतिक कार्यक्रमांचा आनंद घेता यावा या उद्देशाने २४ वर्षांपूर्वी गुजर व इतर सहकाऱ्यांनी फेस्टिव्हलची संकल्पना मांडली होती. त्यानंतर सातत्याने हे कार्यक्रम सादर होत गेले. बारामतीकरांनीही त्याला भरभरून प्रतिसाद दिला.’’
यावेळी फेस्टिव्हलचे प्रमुख गुजर, अतिरिक्त पोलिस अधीक्षक गणेश बिरादार, उपविभागीय अधिकारी वैभव नावडकर, उपविभागीय पोलिस अधिकारी सुदर्शन राठोड, सार्वजनिक बांधकाम विभागाचे कार्यकारी अभियंता अमोल पवार, मुख्याधिकारी पंकज भुसे, एमआयडीसीचे प्रादेशिक अधिकारी हनुमंत पाटील, उपमुख्यमंत्र्यांचे विशेष कार्यकारी अधिकारी सचिन यादव, स्वीय सहायक बाळराजे मुळीक यांच्यासह अनेक अधिकारी उपस्थित होते.
गुजर यांनी प्रास्ताविकात आगामी वर्ष फेस्टिव्हलचे रौप्यमहोत्सवी वर्ष असल्याने बारामतीकरांनी आजपर्यंत कधी पाहिले नसतील अशा तोडीचे कार्यक्रम पुढील वर्षात सादर करण्याची इच्छा बोलून दाखविली होती.

झाडांचे नुकसान करू नका
बारामती हरित असावी यासाठी जाणीवपूर्वक आपण झाडे लावत आहोत. बारामतीकरांनीही कष्टाने लावलेली झाडे जपावी. सण उत्सवाच्या काळात झाडे खराब होणार नाही याची काळजी घ्यावी, असे आवाहन पवार यांनी केले.