बारामतीत नवीन वाहनक्रमांक मालिका सुरू

बारामती, ता. २१: परिवहन संवर्गातील वाहनांसाठी बारामती उप प्रादेशिक परिवहन कार्यालयात ‘‘एमएच 42 बीयू’’ क्रमांकाची नवीन मालिका सुरू करण्यात येणार आहे. आकर्षक क्रमांक राखून ठेवण्यासाठी अर्ज करण्याचे आवाहन उपप्रादेशिक परिवहन अधिकारी सुरेंद्र निकम यांनी केले आहे.
ज्या खासगी चारचाकी वाहनांसाठी तिप्पट रक्कम भरून आकर्षक तसेच पसंतीचा क्रमांक हवा असेल त्यांनी २४ सप्टेंबर रोजी दुपारी अडीचपर्यंत धनाकर्षासह (डी.डी.) विहित नमुन्यात अर्ज करावा. एकाच क्रमांकाकरिता एकापेक्षा जास्त अर्ज आल्यास त्यांची यादी २४ सप्टेंबरला कार्यालयीन सूचना फलकावर लावण्यात येणार आहे. यादीतील अर्जदारांना लिलावासाठी जास्त रकमेचा डी.डी. जमा करावयाचा असेल त्यांनी २५ सप्टेंबरला दुपारी साडेतीन वाजेपर्यंत सीलबंद पाकिटात कार्यालयात जमा करावा. त्याच दिवशी दुपारी चार वाजता संबंधित अर्जदारांसमोर लिफाफे उघडून विनिर्दिष्ट शुल्कांपेक्षा जास्तीत जास्त रक्कमेचा धनाकर्ष भरलेल्या व्यक्तीस नमूद पसंती क्रमांक वितरित केला जाणार आहे. २५ सप्टेंबर रोजी केवळ परिवहन संवर्गातील वाहनांकरिता आकर्षक तसेच पसंती क्रमांकांचे विहित शुल्कासह अर्ज दुपारी अडीच वाजेपर्यंत स्वीकारले जाणार आहेत.