बारामती, लोणावळा, चाकणला इंदूरप्रमाणे स्वच्छता व्यवस्था

बारामती, ता. २८ : ‘‘देशात गेली अनेक वर्षे सर्वात स्वच्छ शहर म्हणून इंदूरची ओळख आहे, त्याच धर्तीवर पुणे जिल्ह्यातील बारामती, लोणावळा व चाकण या तीन शहरांमध्ये स्वच्छतेबाबत व्यवस्था निर्माण करण्याचा माझा प्रयत्न आहे,’’ अशी माहिती उपमुख्यमंत्री अजित पवार यांनी दिली.
बारामती सहकारी बँकेच्या वार्षिक सर्वसाधारण सभेत बोलताना त्यांनी याबाबत माहिती दिली. ते म्हणाले, ‘‘इंदूर सलग अनेक वर्षे स्वच्छ शहर म्हणून नावलौकीक प्राप्त करत आहे. पुणे जिल्ह्यातील बारामती, लोणावळा व चाकण या तीन शहरांची स्वच्छतेबाबतची व्यवस्था त्याच धर्तीवर करण्याचा माझा प्रयत्न आहे. यात महिलांची मला साथ हवी आहे. तेथे ओला व सुका कचरा वेगळा साठवला जातो, वेळेवर घंटागाडी येते, त्यांना तो कचरा दिला जातो. जे निवृत्त लोक आहेत त्यांनीही अशा सार्वजनिक कामात मला मदत केली पाहिजे, अशी माझी अपेक्षा आहे. याबाबत मला काही कठोर निर्णय घ्यावे लागतील, पण शहर स्वच्छतेच्या दृष्टीने असे निर्णय घेतले जातील.’’

बारामतीसाठी उपमुख्यमंत्र्यांकडून निधींची घोषणा
- बारामतीत तीन ठिकाणी सुमारे दोन कोटी रुपये खर्चून स्मार्ट टॉयलेटची उभारणी केली जाणार आहे.
- शारदा प्रांगणात अल्प उत्पन्न गटातील मुलांसाठी इंग्रजी सीबीएसई शाळा एक संस्था सुरु करणार असून, त्यासाठी १७ कोटी ५० लाख रुपये खर्चून अत्याधुनिक इमारत उभारण्यात येत आहे.
- उर्दू शाळेच्या इमारतीसाठीही सात कोटींचा निधी दिला आहे.
- तिरंगा सर्कल ते पेन्सिल चौक राहिलेली कामे करण्यासाठी अतिरिक्त पाच कोटी दिले आहे.
- सिल्व्हर ज्युबिली रुग्णालयाशेजारी महावितरणची नवीन इमारत उभारली जाणार आहे.
- जळोची येथे अग्निशामक केंद्र उभारणीसाठी दोन कोटींचा निधी दिला.
- श्रीमंत बाबूजी नाईक वाड्यामध्ये भीमथडी ते बारामती हा इतिहास दृकश्राव्य माध्यमातून पुढील पिढीसमोर दाखविला जाणार आहे.

‘मोरगावला भाविकांची संख्या वाढणार’
अजित पवार यांनी सांगितले कीस, अष्टविनायक विकास आराखड्यासाठी २५० कोटींचा निधी दिला आहे. त्यातून मोरगावचा विकास असा करणार आहे की येथील भाविकांची संख्या निश्चित वाढणार आहे. मोरगाव व मुर्टीच्या शाळांनाही सीएसआरमधून निधी दिला आहे.