विवाहितेच्या छळाप्रकरणी बारामतीत सहा जणांवर गुन्हा

बारामती, ता. २९ : माहेरहून पैसे आणावेत या मागणीसाठी शारिरिक व मानसिक छळ केल्याची फिर्याद एका विवाहितेने दाखल केल्यानंतर शहर पोलिसांनी या प्रकरणी पती, सासू सासरे, दीर व जाऊ यांच्याविरुध्द गुन्हा दाखल केला आहे.
या प्रकरणी शुभांगी किशोर गायकवाड (रा. लासुर्णे, ता. इंदापूर, सध्या रा. बारामती) यांनी फिर्याद दिली आहे. या फिर्यादीवरून पती किशोर बलभीम गायकवाड, सासरे बलभीम गायकवाड, सासू आशा गायकवाड, दीर अक्षय गायकवाड, गोदाबाई बाबू गायकवाड, पूजा अक्षय गायकवाड यांच्या विरोधात पोलिसांनी गुन्हा दाखल केला आहे.
फिर्यादीत नमूद केले आहे की, लग्नानंतर माहेरहून घर बांधण्यासह टेम्पो खरेदीसाठी पैसे आण यासाठी सासरच्या लोकांनी तगादा लावला होता. हा त्रास बघून आजोबा विष्णू जयवंत यादव यांनी एक लाख २० हजार रुपये घरबांधणी व टेम्पोसाठी दिले होते. या नंतरही सोन्याची अंगठी आण म्हणून पतीने तगादा लावला होता. संशय घेत मोबाईल काढून घेत घरातून हाकलून दिल्याने माहेरी आल्याचे त्यांनी नमूद केले आहे.