रयतच्या स्थापनादिनानिमित्त बारामतीत कार्यक्रम

बारामती, ता. ५ : रयत शिक्षण संस्थेच्या स्थापनेस १०६ वर्षे पूर्ण झाल्यानिमित्त संस्थेच्या आर. एन. अगरवाल टेक्निकल हायस्कूलमध्ये कार्यक्रमाचे आयोजन करण्यात आले होते. कार्यक्रमाच्या सुरूवातीला कर्मवीरांच्या प्रतिमेचे पूजन केले गेले. या प्रसंगी विकास जाधव यांनी राज्याच्या जडणघडणीमध्ये रयत शिक्षण संस्थेच्या योगदानाचे महत्त्व विशद केले. कर्मवीर भाऊराव पाटील यांचा त्याग आणि समर्पण या मुळे ही संस्था नावारुपाला आली आणि अनेक पिढ्या घडविण्याचे काम संस्थेने केल्याचे जाधव यांनी नमूद केले. प्राचार्य भगवानराव भिसे यांनी कर्मवीर अण्णा यांच्यामुळे माझ्यासारख्या अनेक गोरगरीब घरातील मुले शिक्षण घेऊ शकली, हे नमूद करत रयत शिक्षण संस्थेची सध्याची वाटचाल याविषयी मार्गदर्शन केले. यावेळी उपमुख्याध्यापक सतीश पाचपुते, पर्यवेक्षिका अलका चौधर आदी उपस्थित होते. प्रास्ताविक गुरुकुल प्रमुख अरविंद मोहिते यांनी केले.